

'अफगान जलेबी' हे गाणं अनेकांनी ऐकलं असेल. गाण्यामुळे या नावाची ओळखही झाली असेल. पण अफगान जिलेबी हा केवळ गाण्यातील शब्द नसून एक खास गोड पदार्थही आहे. नेहमीच्या जिलेबीपेक्षा काहीशी वेगळी चव आणि कुरकुरीत पोत असलेली ही जिलेबी घरीही तयार करता येते. यासाठी फार वेगळं साहित्य लागत नाही. मैदा, दही, कॉर्नफ्लोअर आणि साखरेच्या पाकापासून ही जिलेबी बनवता येते. चला तर मग, अफगान जिलेबी बनवण्याची सोपी रेसिपी जाणून घेऊया.
साहित्य
मैदा - १ कप
कॉर्नफ्लोअर - २ चमचे
दही - अर्धा कप
बेकिंग सोडा - १ चिमूट
तळण्यासाठी तेल किंवा तूप
केशरी फूड कलर - ऐच्छिक
साखरेचा पाक बनवण्यासाठी साहित्य
साखर - १ कप
पाणी - अर्धा कप
वेलची - २ ते ३
लिंबाचा रस - काही थेंब
अफगान जिलेबी बनवण्याची सोपी कृती
१. जिलेबीचे पीठ तयार करा
सर्वप्रथम एका मोठ्या भांड्यात मैदा, कॉर्नफ्लोअर, दही आणि बेकिंग सोडा एकत्र करा. आवश्यकतेनुसार थोडे पाणी घालून गुठळ्या नसलेले घट्टसर पीठ तयार करा. पीठ खूप पातळ करू नका. आवडीनुसार त्यात थोडा केशरी फूड कलर घालू शकता.
२. पीठ आंबण्यासाठी ठेवा
तयार पीठ झाकून साधारण ६ ते ८ तास उबदार ठिकाणी आंबण्यासाठी ठेवा. त्यामुळे जिलेबीला योग्य पोत मिळण्यास मदत होते. थंडीच्या दिवसांत पीठ आंबण्यासाठी थोडा अधिक वेळ लागू शकतो.
३. साखरेचा पाक तयार करा
एका पातेल्यात साखर आणि पाणी एकत्र करून मध्यम आचेवर गरम करा. त्यात वेलची आणि काही थेंब लिंबाचा रस घाला. साखर विरघळून पाकाला किंचित चिकटपणा येईपर्यंत उकळा. पाक फार घट्ट करू नका.
४. जिलेबीचा आकार द्या
आंबलेले पीठ चांगले हलवून घ्या आणि सॉसच्या बाटलीत किंवा जाडसर नळीच्या पिशवीत भरा. कढईत तेल किंवा तूप गरम करा. त्यात पिठाच्या साहाय्याने गोलाकार वळण देत जिलेबीचा आकार तयार करा.
५. जिलेबी तळून पाकात घाला
जिलेबी मंद ते मध्यम आचेवर सोनेरी आणि कुरकुरीत होईपर्यंत तळा. त्यानंतर ती तेलातून काढून काही क्षण कोमट साखरेच्या पाकात ठेवा. पाक जिलेबीला व्यवस्थित लागल्यानंतर बाहेर काढा.
अशा प्रकारे घरच्या घरी तयार होईल खमंग आणि कुरकुरीत अफगान जिलेबी . गरमागरम चहा किंवा रबडीसोबत या गोड पदार्थाचा आस्वाद घेता येईल.
टीप : जिलेबी तळताना तेल किंवा तूप खूप जास्त गरम नसावे. अन्यथा बाहेरून जिलेबी लवकर रंगेल; पण आतून योग्य प्रकारे शिजणार नाही. तसेच पाकात जास्त वेळ ठेवल्यास जिलेबीचा कुरकुरीतपणा कमी होऊ शकतो.