स्वयंपाक केल्यानंतर भांडी घासणे हे अनेकांसाठी वेळखाऊ काम असते. विशेषतः कढई किंवा पॅनवर तेलकटपणा आणि अन्नाचे अवशेष घट्ट चिकटले असतील, तर ते काढण्यासाठी वारंवार घासावे लागते. मात्र, घरात सहज उपलब्ध असलेल्या ॲल्युमिनियम फॉइलच्या मदतीने हे काम काहीसे सोपे करता येऊ शकते.
फॉइल फेकून देण्याआधी हा उपाय पाहा
ॲल्युमिनियम फॉइलचा वापर आपण प्रामुख्याने अन्न झाकण्यासाठी किंवा साठवण्यासाठी करतो. मात्र, वापरलेली फॉइल स्वच्छ असेल तर तिचा पुनर्वापर भांडी साफ करण्यासाठी करता येतो. फॉइलचा सैलसर गोळा करून चिकटलेल्या भागावर हलक्या हाताने घासल्याने अन्नाचे अवशेष आणि ग्रीस सैल होण्यास मदत होऊ शकते.
१. भांड्यातील उरलेले अन्न काढा - सुरुवातीला चमचा किंवा डावाच्या मदतीने भांड्यातील उरलेले अन्न काढून घ्या. या टप्प्यावर जोरात घासण्याची गरज नाही.
२. भांडे काही वेळ भिजत ठेवा - भांड्यात गरम पाणी आणि काही थेंब डिशवॉशिंग लिक्विड घाला. काही मिनिटे भांडे तसेच ठेवले तर चिकटलेले अन्न मऊ होण्यास मदत होते.
३. फॉइलचा सैल गोळा करा - ॲल्युमिनियम फॉइलचा एक तुकडा घेऊन त्याचा सैलसर गोळा करून घ्या. गोळा खूप घट्ट करू नका.
४. हलक्या हाताने घासा - फॉइलचा गोळा भांड्यावरील तेलकट किंवा डाग पडलेल्या भागावर हलक्या हाताने गोलाकार पद्धतीने फिरवा. अवशेष सैल होईपर्यंतच घासा.
५. साबणाने धुवून स्वच्छ करा - अवशेष निघाल्यानंतर थोडे डिशवॉशिंग लिक्विड लावून भांडे धुवा. त्यानंतर स्वच्छ पाण्याने व्यवस्थित धुऊन कोरडे करा.
'या' वस्तूंच्या स्वच्छतेसाठीही फॉइलचा उपयोग
भांड्यांव्यतिरिक्त ओव्हन रॅक्स, ग्रिल ग्रेट्स आणि मेटल बेकिंग ट्रेवरील चिकटलेले डाग काढण्यासाठीही अॅल्युमिनियम फॉइलचा वापर केला जातो. स्टेनलेस स्टीलच्या काही वस्तूंवरील पृष्ठभागावरील डाग आणि अवशेष साफ करण्यासाठीही हलक्या हाताने फॉइलचा उपयोग करता येतो.
पण 'या' भांड्यांवर वापरू नका
ॲल्युमिनियम फॉइलने घासण्यापूर्वी भांड्याचा पृष्ठभाग लक्षात घेणे महत्त्वाचे आहे. नॉन-स्टिक भांड्यांवर फॉइल वापरू नका, कारण त्यामुळे त्यावरील कोटिंग खराब होऊ शकते. इतर पृष्ठभागांवरही आधी छोट्या भागावर हा उपाय करून पाहा आणि नेहमी हलक्या हातानेच घासा.
वापरलेली अॅल्युमिनियम फॉइल लगेच कचऱ्यात टाकण्याऐवजी, योग्य पृष्ठभागाच्या स्वच्छतेसाठी तिचा पुनर्वापर करता येऊ शकतो. त्यामुळे भांडी घासण्याचे कष्ट काही प्रमाणात कमी होण्यास मदत होऊ शकते.
