नाश्त्याला रोज तेच तेच पदार्थ खाऊन कंटाळा आला असेल, तर थोडा बदल करायलाच हवा. फार काही वेगळं न करता, अगदी साध्या साहित्यातून तयार होणारी बटाटा पुरी ही अशी रेसिपी आहे, जी पहिल्या घासातच आपलीशी वाटते. बाहेरून कुरकुरीत आणि आतून मऊ, मसाल्यांचा हलका सुवास आणि बटाट्यांची चव - त्यामुळे ही पुरी नॉर्मल पुऱ्यांपेक्षा जरा हटके लागते. लहान मुलांचा डबा असो किंवा मोठ्यांसाठी खास नाश्ता, हा पदार्थ सगळ्यांनाच भावतो.
बटाटा पुरीसाठी लागणारं साहित्य :
उकडलेले बटाटे
गव्हाचे पीठ
हिरवी मिरची
आले
जिरे
हळद
लाल तिखट
धणे-जिरे पूड
मीठ
कोथिंबीर
तेल (तळण्यासाठी)
कृती :
सुरुवातीला उकडलेले बटाटे नीट मॅश करून घ्या. त्यात हिरवी मिरची, आले, जिरे, हळद, लाल तिखट, धणे-जिरे पूड आणि मीठ घालून मिश्रण एकजीव करा. या मिश्रणात हळूहळू गव्हाचे पीठ घालून घट्ट पीठ मळा. पाणी घालायची फारशी गरज लागत नाही.
पीठ थोडा वेळ झाकून ठेवा, नंतर लहान गोळ्या करून पुऱ्या लाटा. गरम तेलात मध्यम आचेवर सोनेरी रंग येईपर्यंत तळा.
गरमागरम बटाटा पुरी टोमॅटो चटणी, दही, लोणचं किंवा साध्या ताकासोबत दिली, तर साधा नाश्ताही खास बनतो. एकदा घरी करून पाहिली, की ही रेसिपी तुमच्या कायमच्या फेव्हरेट यादीत नक्कीच सामील होईल.
• बटाटे पूर्ण थंड करूनच मॅश करा
गरम बटाटे मॅश केल्यास पीठ चिकट होतं आणि पुरी लाटताना अडचण येते.
• पीठ मळताना पाणी जपून वापरा
बटाट्यांमुळे आधीच ओलावा असतो, त्यामुळे पाणी जास्त घातल्यास पुऱ्या तेलात फुलत नाहीत.
• पीठ १०–१५ मिनिटं झाकून ठेवा
थोडा वेळ दिल्यास मसाले छान मुरतात आणि पुऱ्या अधिक मऊ व हलक्या होतात.
• पुरी फार पातळ लाटू नका
जरा जाडसर पुरी लाटल्यास तळताना छान फुलतात आणि आतून मऊ राहतात.
• तेल मध्यम आचेवर गरम ठेवा
तेल खूप गरम असेल तर पुऱ्या पटकन रंग बदलतात, पण आतून कच्च्या राहू शकतात.
• डब्यासाठी करायच्या असतील तर
पुरी पूर्ण थंड झाल्यावरच डब्यात ठेवा, त्यामुळे मऊ पडत नाहीत.
