हिरवीगार, रसाळ आणि चवीला आंबट-गोड असलेली किवी आरोग्यासाठी फायदेशीर फळ मानले जाते. किवीमध्ये मोठ्या प्रमाणात फायबर, जीवनसत्त्वे आणि अँटीऑक्सिडंट्स असतात. त्यामुळे पचनक्रिया सुरळीत ठेवण्यासाठी आणि आतड्यांचे आरोग्य चांगले राहण्यासाठी किवी खाण्याचा सल्ला दिला जातो. मात्र, किवी खाताना अनेकजण तिची साल काढून टाकतात. पोषणतज्ज्ञांच्या मते, असे केल्याने किवीतील फायबर आणि अँटीऑक्सिडंट्सचा मोठा भाग कमी होतो. त्यामुळे किवी नेमकी कशी खावी, हिरवी की गोल्डन किवी कोणती आणि दिवसातून किती किवी खावी? हे जाणून घेणे महत्त्वाचे आहे.
सालीसह किवी खाल्ल्याने अधिक फायदा
पोषणतज्ज्ञ लीमा महाजन यांच्या मते, किवीची साल काढून खाल्ल्यास फळातील फायबर आणि अँटीऑक्सिडंट्सचा मोठा भाग गमावला जातो. त्यामुळे किवी शक्य असल्यास सालीसह खाणे फायदेशीर ठरू शकते.
१. हिरवी किवी कशी खावी?
हिरवी किवी पोषक घटकांनी समृद्ध असते. ती सालीसह खाल्ल्यास फक्त गर खाण्याच्या तुलनेत सुमारे दुप्पट फायबर आणि जवळपास पाचपट पॉलीफेनॉल्स मिळू शकतात. फायबरमुळे पचनक्रिया सुरळीत होण्यास आणि नियमित शौचास मदत होऊ शकते. तसेच पॉलीफेनॉल्स हे शरीरासाठी उपयुक्त अँटीऑक्सिडंट घटक आहेत.
मात्र, हिरव्या किवीच्या सालीवर बारीक केसांसारखे तंतू असतात. त्यामुळे अनेकांना ती साल खाणे आवडत नाही. अशावेळी पुढील पद्धत वापरता येऊ शकते.
किवी वाहत्या पाण्याखाली व्यवस्थित धुवावी.
स्वच्छ किचन टॉवेलने साल हलक्या हाताने घासावी.
त्यानंतर किवीचे पातळ काप करून सालीसह खावी.
२. गोल्डन किवी सालीसह खाण्याचे फायदे
गोल्डन किवीची साल हिरव्या किवीच्या तुलनेत पातळ आणि गुळगुळीत असते. त्यावर केसही नसल्याने ती सालीसह खाणे तुलनेने सोपे जाते.
गोल्डन किवी सालीसह खाल्ल्यास केवळ गर खाण्याच्या तुलनेत सुमारे ५० टक्के अधिक फायबर, ३२ टक्के अधिक व्हिटॅमिन ई आणि ३४ टक्के अधिक फोलेट मिळू शकते. त्यामुळे साल काढण्याऐवजी किवी व्यवस्थित धुऊन सालीसह खाण्याचा पर्याय निवडता येतो.
दिवसातून किती किवी खावी?
तज्ज्ञांच्या मते, दररोज दोन किवी चार आठवडे खाल्ल्याने शौचास नियमित होण्यास आणि आतड्यांचे आरोग्य सुधारण्यास मदत होऊ शकते.
यासाठी करण्यात आलेल्या एका अभ्यासात १८४ जणांचा समावेश करण्यात आला होता. काही लोकांना दररोज दोन किवी खाण्यास सांगण्यात आले, तर काहींना बद्धकोष्ठतेसाठी वापरले जाणारे इसबगोलाचे सेवन करण्यास सांगण्यात आले. चार आठवड्यांनंतर किवी खाणाऱ्या लोकांमध्ये शौचाची नियमितता वाढल्याचे, शौचास होणारा त्रास कमी झाल्याचे आणि पचनाशी संबंधित तक्रारींमध्ये सुधारणा झाल्याचे आढळले.
किवी पचनासाठी का फायदेशीर ठरू शकते?
किवीमध्ये विविध प्रकारचे फायबर असते. त्यातील विरघळणारे फायबर पचनक्रियेला मदत करते, तर प्रीबायोटिक फायबर आतड्यांमध्ये असलेल्या चांगल्या जिवाणूंना पोषण देण्यास मदत करते. त्यामुळे किवीचा आहारात समावेश केल्याने आतड्यांचे आरोग्य आणि शौचाची नियमितता राखण्यास मदत होऊ शकते.
मात्र, प्रत्येक व्यक्तीची पचनशक्ती आणि आहाराची गरज वेगळी असते. त्यामुळे किवी खाल्ल्यानंतर काही त्रास होत असल्यास आहारतज्ज्ञ किंवा डॉक्टरांचा सल्ला घेणे योग्य ठरते.
(Disclaimer: यामध्ये दिलेले आरोग्यविषयक सल्ले सामान्य मार्गदर्शनासाठी आहेत. 'नवशक्ति' यातून कोणताही दावा करत नाही.)
