दिवसाची सुरुवात चहा किंवा कॉफीशिवाय होत नाही, अशी सवय अनेकांना असते. सकाळी झोपेची गुंगी घालवण्यासाठी कॅफिनचा आधार घेतला जातो. मात्र शरीराला ऊर्जा देण्यासाठी नेहमीच चहा किंवा कॉफीची गरज असते असं नाही. योग्य पदार्थांची निवड केली, तर सकाळपासून दिवसभर शरीर ताजेतवाने आणि ऊर्जावान राहू शकतं.
एचटी लाइफस्टाइलशी बोलताना इंटिग्रेटिव्ह वेलनेस कोच आणि फंक्शनल न्यूट्रिशनिस्ट नीरजा मेहता यांनी सकाळच्या आहारात समाविष्ट करता येतील असे काही नैसर्गिक ऊर्जा देणारे पदार्थ सुचवले आहेत. हे पदार्थ शरीराला हळूहळू ऊर्जा देतात आणि थकवा कमी करण्यास मदत करू शकतात.
१. ओट्स
ओट्स हा सकाळच्या नाश्त्यासाठी उत्तम पर्याय मानला जातो. त्यात असलेले फायबर आणि कॉम्प्लेक्स कार्बोहायड्रेट्स शरीराला हळूहळू ऊर्जा देतात. त्यामुळे लवकर भूक लागत नाही. ओट्सचे पोरिज, स्मूदी किंवा ओव्हरनाईट ओट्स अशा विविध प्रकारांनी सेवन करता येते.
२. अंडी
अंड्यांमध्ये उच्च दर्जाचे प्रोटीन असते, जे शरीराला दीर्घकाळ तृप्त ठेवते. त्यात कोलीन, व्हिटॅमिन B आणि सेलेनियमसारखे पोषक घटक असतात. सकाळच्या नाश्त्यात उकडलेले अंडे, भुर्जी किंवा होल ग्रेन टोस्टसोबत अंडी खाल्ल्यास चांगली ऊर्जा मिळू शकते.
३. पोहे
हलके आणि पटकन तयार होणारे पोहे हा भारतीय नाश्त्याचा लोकप्रिय पर्याय आहे. भाज्या, शेंगदाणे आणि हलके मसाले घालून तयार केलेले पोहे पचनास सोपे असतात आणि शरीराला ऊर्जा देतात. वेळ कमी असताना हा झटपट पर्याय ठरू शकतो.
४. केळी
केळीमध्ये नैसर्गिक कार्बोहायड्रेट्स, पोटॅशियम आणि व्हिटॅमिन B6 असते. त्यामुळे शरीराला पटकन ऊर्जा मिळण्यास मदत होते. व्यस्त सकाळी किंवा हलका नाश्ता हवा असेल, तर केळी उत्तम पर्याय ठरू शकतात. शेंगदाणा बटर, दही किंवा ड्रायफ्रूट्ससोबतही केळी खाता येतात.
५. ड्रायफ्रूट्स आणि बिया
बदाम, अक्रोड, चिया सीड्स किंवा फ्लॅक्स सीड्स यांसारख्या पदार्थांमध्ये पोषक घटक भरपूर असतात. हे पदार्थ शरीरातील ऊर्जा संतुलित ठेवण्यास मदत करतात. नाश्त्यात थोड्या प्रमाणात ड्रायफ्रूट्सचा समावेश केल्यास पोषणमूल्य वाढते.
६. मोड आलेली कडधान्ये
मोड आलेल्या कडधान्यांमध्ये फायबर, वनस्पतीजन्य प्रोटीन, व्हिटॅमिन्स आणि अँटीऑक्सिडंट्स असतात. सकाळच्या नाश्त्यात मोड आलेले मूग, हरभरे किंवा स्प्राऊट्स सॅलडचा समावेश केल्यास पचन सुधारण्यास आणि ऊर्जा टिकवण्यास मदत होऊ शकते.
कॅफिनशिवायही मिळू शकते नैसर्गिक ऊर्जा
सकाळची सुरुवात नेहमीच चहा-कॉफीने करावी असं नाही. योग्य आहार निवडल्यास शरीराला नैसर्गिक ऊर्जा मिळू शकते. सकाळच्या नाश्त्यात पौष्टिक पदार्थांचा समावेश केल्यास दिवसभर फ्रेश वाटण्यास मदत होते.
Disclaimer : या लेखातील माहिती ही सार्वजनिक स्रोत आणि तज्ज्ञांच्या सर्वसाधारण मार्गदर्शनावर आधारित आहे. ‘नवशक्ति’ या माहितीची अचूकता किंवा परिणामकारकता याची हमी देत नाही. कोणतीही नवीन दिनचर्या, आहार किंवा आरोग्यविषयक सवय सुरू करण्यापूर्वी वैद्यकीय तज्ज्ञांचा सल्ला घेणे आवश्यक आहे.
