उन्हाळा सुरू झाला की थंडगार आणि गोड पदार्थांची इच्छा आपोआप वाढते. बाजारात अनेक फ्लेवरचे आईस्क्रीम सहज मिळतात, पण त्यात वापरले जाणारे कृत्रिम रंग, जास्त साखर आणि प्रिझर्व्हेटिव्ह्ज आरोग्यासाठी नेहमीच चांगले असतील असं नाही. अशावेळी घरच्या घरी बनवलेलं हेल्दी आईस्क्रीम हा उत्तम पर्याय ठरू शकतो. विशेष म्हणजे, रताळ्यासारख्या पौष्टिक पदार्थापासून तयार होणारं हे आईस्क्रीम चवीला वेगळं आणि शरीरासाठी फायदेशीर असतं.
रताळ्यामध्ये फायबर, नैसर्गिक गोडवा आणि पोषक घटक भरपूर प्रमाणात असतात. त्यामुळे हे आईस्क्रीम मुलांपासून मोठ्यांपर्यंत सर्वांसाठी एक हेल्दी ट्रीट ठरू शकते.
साहित्य
रताळी - २ ते ३ मध्यम आकाराची
खजूर - ४ ते ५
कोको पावडर - १ ते २ टेबलस्पून
गूळ - चवीनुसार
व्हॅनिला इसेन्स - काही थेंब
ओल्या खोबऱ्याचं दूध - आवश्यकतेनुसार
चिमूटभर मीठ
ड्रायफ्रूट्स - सजावटीसाठी
कशी बनवाल ही हेल्दी रेसिपी?
१. सर्वप्रथम रताळी स्वच्छ धुऊन उकडून घ्या. थंड झाल्यावर त्याची साल काढून तुकडे करा.
२. मिक्सरमध्ये उकडलेली रताळी, खजूर, कोको पावडर, गूळ, व्हॅनिला इसेन्स, खोबऱ्याचं दूध आणि चिमूटभर मीठ घाला.
३. हे मिश्रण अगदी गुळगुळीत होईपर्यंत ब्लेंड करा. मिश्रण स्मूदीसारखं एकजीव झालं पाहिजे.
४. तयार मिश्रण काचेच्या किंवा एअरटाइट कंटेनरमध्ये ओता. वरून ड्रायफ्रूट्स टाकल्यास चव अधिक छान लागते.
५. कंटेनर ५ ते ६ तास फ्रिजमध्ये ठेवा. मध्ये एकदा हलक्या हाताने ढवळल्यास टेक्स्चर अधिक क्रीमी होते.
६. व्यवस्थित सेट झाल्यावर थंडगार आईस्क्रीम सर्व्ह करा.
रताळ्याचं आईस्क्रीम का ट्राय कराल?
साखरेपेक्षा नैसर्गिक गोडवा
फायबरयुक्त आणि पोटभरणारं
मुलांसाठी हेल्दी स्वीट डिश
कृत्रिम रंग आणि प्रिझर्व्हेटिव्हपासून मुक्त
घरच्या घरी कमी साहित्यांत तयार
उन्हाळ्यात थंडगार आईस्क्रीम खायची इच्छा झाली, तर यावेळी बाजारातील रेडीमेड पर्यायांऐवजी घरचं रताळ्याचं आईस्क्रीम नक्की ट्राय करून पाहा. चव आणि आरोग्याचा सुंदर मेळ असलेली ही रेसिपी तुमच्या किचनमध्ये पुन्हा पुन्हा बनवली जाईल
