उन्हाळा सुरू झाला की त्वचेच्या अनेक समस्या वाढू लागतात. सतत घाम येणं, तेलकटपणा वाढणं, चेहरा थकलेला दिसणं किंवा उन्हामुळे जळजळ होणं, हे अनेकांच्या बाबतीत घडतं. अशावेळी महागड्या स्किन ट्रीटमेंटपेक्षा घरच्या घरी करता येणारे छोटे उपाय अधिक उपयोगी ठरू शकतात.
त्यापैकीच एक सोपा उपाय म्हणजे बर्फाच्या पाण्याचा वापर. थंड पाण्याने चेहरा धुतल्याने किंवा काही सेकंद चेहरा बर्फाच्या पाण्यात बुडवल्याने त्वचेला तात्काळ फ्रेशनेस मिळू शकतो.
थंड पाण्यामुळे त्वचेतील रक्ताभिसरण सुधारण्यास मदत होते. त्यामुळे चेहरा अधिक ताजातवाना आणि उजळ दिसू शकतो.
सकाळी उठल्यानंतर अनेकदा चेहऱ्यावर किंवा डोळ्यांखाली सूज दिसते. अशावेळी बर्फाचं पाणी उपयोगी ठरू शकतं. थंडाव्यामुळे त्वचेतील सूज कमी होण्यास मदत मिळते.
उन्हाळ्यात त्वचेवरील छिद्रे अधिक स्पष्ट दिसू लागतात. थंड पाण्यामुळे हे पोर्स तात्पुरते आकुंचन पावतात, त्यामुळे त्वचा अधिक स्मूथ दिसू शकते.
बर्फाचा थंडावा त्वचेवरील जळजळ आणि लालसरपणा कमी करण्यासाठी फायदेशीर मानला जातो. अचानक आलेल्या पिंपल्समुळे होणारी सूजही काही प्रमाणात कमी होऊ शकते.
अनेकजण मेकअप करण्यापूर्वी बर्फाचं पाणी वापरतात. यामुळे त्वचा फ्रेश दिसते आणि मेकअप अधिक वेळ टिकण्यास मदत होऊ शकते.
बर्फ थेट त्वचेवर जास्त वेळ ठेवू नका
बर्फ नेहमी कापडात गुंडाळून वापरा
अतिसंवेदनशील त्वचा असल्यास काळजी घ्या
वारंवार वापर टाळा
बर्फाचं पाणी हा त्वचेसाठी स्वस्त, सोपा आणि घरच्या घरी करता येणारा उपाय आहे. योग्य प्रमाणात वापरल्यास उन्हाळ्यात त्वचा ताजीतवानी ठेवण्यासाठी तो उपयोगी ठरू शकतो.
(Disclaimer : या लेखातील माहिती ही सामान्य माहिती व घरगुती उपायांवर आधारित आहे. ‘नवशक्ति’ या उपायांच्या परिणामकारकतेची हमी देत नाही. कोणताही उपाय करण्यापूर्वी आपल्या त्वचेच्या प्रकारानुसार तज्ज्ञांचा सल्ला घ्यावा.)
