लांब, दाट आणि चमकदार केसांसाठी महागडी उत्पादनेच आवश्यक असतात असे नाही. केसांची निगा राखताना आपण रोजच्या काही छोट्या सवयींकडे दुर्लक्ष करतो. केसांच्या लांबीपेक्षा त्यांच्या मुळांची आणि स्कॅल्पची योग्य काळजी घेतल्यास केस निरोगी ठेवण्यास मदत होऊ शकते. जपानी हेअर केअर रुटीनमध्येही याच गोष्टींना महत्त्व दिले जाते.
जपानी महिलांच्या केसांची निगा राखण्याच्या पद्धतीमध्ये स्कॅल्प स्वच्छ ठेवणे, केसांवर अनावश्यक ताण न देणे आणि ओलावा टिकवून ठेवणे यावर भर असतो. घरच्या घरी करता येतील अशा काही सोप्या सवयी तुम्हीही आपल्या हेअर केअर रुटीनमध्ये समाविष्ट करू शकता.
स्कॅल्प मसाज करताना नखांचा वापर नको
केसांची निगा राखताना फक्त केसांवर लक्ष देण्याऐवजी स्कॅल्पची काळजी घेणेही महत्त्वाचे आहे. तेल किंवा शाम्पू लावताना बोटांच्या टोकांनी स्कॅल्पवर हलक्या हाताने गोलाकार मसाज करता येतो.
मानेच्या वरच्या भागापासून डोक्याच्या वरच्या भागापर्यंत सौम्य मसाज केल्याने स्कॅल्पला आराम मिळतो. मात्र, मसाज करताना नखांनी त्वचा खरवडणे टाळा. बोटांच्या टोकांनी हलक्या हाताने मसाज करणे योग्य ठरते. यासाठी सिलिकॉन स्कॅल्प ब्रशचाही वापर करता येतो.
शाम्पूपूर्वी तेल लावण्याची सवय
केस धुण्याआधी तेल लावणे ही आणखी एक साधी सवय आहे. केसांच्या प्रकारानुसार हलके तेल घेऊन ते स्कॅल्प आणि केसांना लावता येते. साधारण अर्धा ते एक तास तेल ठेवून त्यानंतर शाम्पू करता येतो.
विशेषतः कोरडे किंवा रुक्ष केस असतील तर ही पद्धत केसांना मऊ ठेवण्यास मदत करू शकते. मात्र, प्रत्येकाच्या स्कॅल्प आणि केसांचा प्रकार वेगळा असल्याने तेल किती वेळ ठेवायचे आणि किती प्रमाणात वापरायचे हे त्यानुसार ठरवावे.
ओले केस टॉवेलने जोरात घासू नका
केस धुतल्यानंतर त्यांची काळजी घेण्याची पद्धतही तितकीच महत्त्वाची आहे. ओले केस तुलनेने नाजूक असतात. त्यामुळे टॉवेलने केस जोरात घासणे, पिळणे किंवा ओढणे टाळावे.
केसांमधील अतिरिक्त पाणी हाताने हलकेच दाबून काढा. त्यानंतर मायक्रोफायबर टॉवेल किंवा मऊ कॉटन टी-शर्टच्या मदतीने केस अलगद कोरडे करता येतात. हेअर ड्रायर वापरत असल्यास अतिउष्ण तापमानाचा सतत वापर टाळणे चांगले.
केसांसोबत आहार आणि पाण्याकडेही लक्ष द्या
फक्त बाहेरून केलेली केसांची निगा पुरेशी नसते. संतुलित आहार, पुरेसे पाणी आणि योग्य झोप यांचाही एकूण आरोग्यावर परिणाम होतो. त्यामुळे हेअर केअर रुटीनसोबत आहाराकडेही लक्ष देणे आवश्यक आहे.
केसगळती अचानक वाढली असेल, टाळूवर खाज किंवा इतर त्रास होत असेल किंवा बराच काळ केस गळत असतील, तर केवळ घरगुती उपायांवर अवलंबून न राहता त्वचारोगतज्ज्ञांचा सल्ला घ्यावा.
टीप : हा लेख सामान्य माहितीसाठी आहे. कोणत्याही उपायाची नवशक्ति खात्री देत नाही.)
