सकाळी लवकर उठण्याचा अनेकांचा निर्धार असतो. पण अलार्म वाजल्यानंतर तो बंद करून पुन्हा झोपण्याची सवय अनेकांना असते. त्यामुळे घाईगडबडीत दिवसाची सुरुवात होते आणि कामावर किंवा कॉलेजला उशीरही होतो. मात्र काही सोप्या सवयी अंगीकारल्या तर सकाळी वेळेत उठणे शक्य आहे.
स्नूझ बटण टाळा
अलार्म वाजल्यानंतर स्नूझ बटण दाबण्याची सवय अनेकांना असते. पण त्यामुळे झोपेचे चक्र बिघडते. एकदा अलार्म वाजला की लगेच उठण्याचा प्रयत्न करा.
अलार्म दूर ठेवा
मोबाइल किंवा घड्याळ पलंगापासून थोडे दूर ठेवा. त्यामुळे अलार्म बंद करण्यासाठी उठावे लागेल आणि पुन्हा झोपण्याची शक्यता कमी होईल.
रात्री पुरेशी झोप घ्या
रात्री उशिरापर्यंत मोबाईल वापरणे किंवा काम करणे टाळा. दररोज किमान ७ ते ८ तासांची झोप घेतल्यास सकाळी उठणे सोपे जाते.
झोपण्याची निश्चित वेळ ठरवा
दररोज साधारण एकाच वेळी झोपण्याची सवय लावा. त्यामुळे शरीराचे जैविक घड्याळ (Body Clock) व्यवस्थित काम करू लागते.
सकाळी हलका व्यायाम करा
उठल्यानंतर थोडा स्ट्रेचिंग किंवा हलका व्यायाम केल्यास शरीर ताजेतवाने होते आणि झोप पटकन उडते. तसेच उठल्यानंतर खिडकी उघडा किंवा सूर्यप्रकाशात काही वेळ उभे रहा. नैसर्गिक प्रकाशामुळे शरीराला जाग येण्यास मदत होते.
सकाळची छोटी दिनचर्या ठरवा
सकाळी चहा-कॉफी, चालणे किंवा आवडते संगीत ऐकणे अशा छोट्या सवयी ठेवा. त्यामुळे उठण्याची प्रेरणा मिळते.
नियमित सवयी बदलल्या तर सकाळी वेळेत उठणे शक्य होते.
अलार्म बंद करून पुन्हा झोपण्याऐवजी या छोट्या टिप्स वापरून पाहिल्या तर दिवसाची सुरुवात अधिक उत्साही होऊ शकते.
