आजकाल वेव्ही आणि कर्ली हेअरस्टाईलचा ट्रेंड जोरात आहे. नैसर्गिक कुरळे केस चेहऱ्याचं सौंदर्य खुलवतात आणि लूकलाही वेगळा आकर्षकपणा देतात. मात्र अनेकजण केस कर्ल करण्यासाठी वारंवार हीट मशीन, कर्लर किंवा रासायनिक उत्पादने वापरतात. यामुळे काही काळासाठी केस सुंदर दिसले तरी दीर्घकाळात ते कोरडे, नाजूक आणि तुटण्याची शक्यता वाढते.
केसांचं आरोग्य टिकवून ठेवत नैसर्गिक पद्धतीने कर्ल्स मिळवायचे असतील, तर काही सोपे घरगुती उपाय उपयोगी ठरू शकतात. विशेष म्हणजे यासाठी कोणत्याही महागड्या उत्पादनांची किंवा हीट टूल्सची गरज भासत नाही.
ओलसर केसांमध्ये वेणी घाला
केस धुतल्यानंतर ते पूर्ण कोरडे होण्यापूर्वी दोन किंवा चार वेण्या घालून ठेवा. काही तासांनंतर किंवा दुसऱ्या दिवशी वेण्या सोडल्यावर केसांमध्ये नैसर्गिक वेव्ही लूक दिसू लागतो. अधिक कर्ल्स हवे असतील तर लहान आणि घट्ट वेण्या घालणं फायदेशीर ठरू शकतं.
कापडी पट्टीची ट्रिक
मऊ कापड किंवा जुन्या टी-शर्टच्या पट्ट्या वापरूनही केस सहज कर्ल करता येतात. केसांचे छोटे भाग घेऊन ते पट्टीभोवती गुंडाळा आणि काही वेळ तसेच ठेवा. ही पद्धत केसांवर कोणताही ताण न आणता सुंदर कर्ल्स तयार करण्यास मदत करते.
हेडबँड कर्लिंग
सॉफ्ट हेडबँड घालून त्यामध्ये केसांचे भाग गुंडाळून ठेवावेत. काही तासांनी केस सोडल्यावर मऊ आणि नैसर्गिक कर्ल्स तयार होतात. रात्री झोपण्यापूर्वी हा उपाय केल्यास सकाळी तयार हेअरस्टाईल मिळू शकते.
अॅलोव्हेरा जेलचा वापर
कर्ल्स अधिक व्यवस्थित आणि टिकाऊ दिसावेत यासाठी थोड्या प्रमाणात अॅलोव्हेरा जेल वापरता येऊ शकतं. यामुळे केस मऊ राहतात आणि त्यांचं नैसर्गिक टेक्स्चरही जपलं जातं. मात्र जेलचा अतिरेक टाळणं आवश्यक आहे.
लक्षात ठेवा...
कर्ल्स तयार करण्यासाठी केस पूर्ण ओले किंवा पूर्ण कोरडे नसावेत. किंचित ओलसर केसांवर हे उपाय अधिक प्रभावी ठरतात. तसेच केस गुंडाळताना त्यांना जास्त ताण देऊ नये, अन्यथा केस तुटण्याचा धोका वाढू शकतो.
थोडी काळजी आणि योग्य पद्धती वापरल्यास कोणत्याही मशीन किंवा केमिकलशिवाय घरच्या घरी सुंदर, मऊ आणि नैसर्गिक कर्ल्स मिळवणं शक्य आहे.
