नेहमीची इडली खाऊन कंटाळा आला असेल आणि नाश्त्यामध्ये काहीतरी झणझणीत, मसालेदार आणि चटपटीत खायची इच्छा असेल, तर तवा इडली नक्की ट्राय करा. इडलीचे तुकडे कांदा, टोमॅटो, हिरवी मिरची आणि विविध मसाल्यांसोबत तव्यावर परतून तयार केलेली ही डिश चवीला अगदी स्ट्रीट स्टाईल लागते. यासाठी उरलेली इडली असण्याची गरज नाही, ताजी इडली बनवूनही अवघ्या १० मिनिटांत ही स्वादिष्ट तवा इडली तयार करता येते.
साहित्य :
४ इडल्या
१ कांदा (बारीक चिरलेला)
१ टोमॅटो (बारीक चिरलेला)
१ हिरवी मिरची (बारीक चिरलेली)
अर्धा इंच आले (बारीक चिरलेले)
१ टीस्पून कोथिंबीर (बारीक चिरलेली)
१ टेबलस्पून किसलेले खोबरे
१ काडी कढीपत्ता
पाव टीस्पून मोहरी
पाव टीस्पून उडीद डाळ
१ टेबलस्पून भाजलेले शेंगदाणे किंवा काजू
अर्धा टीस्पून हळद
१ टेबलस्पून सांबार मसाला
१ टीस्पून पावभाजी मसाला (ऐच्छिक)
१ टेबलस्पून लिंबाचा रस
१ टेबलस्पून तूप किंवा तेल
१ टीस्पून बटर
चवीनुसार मीठ
कृती :
१. इडलीचे तुकडे करा - शिजलेल्या किंवा उरलेल्या इडल्या मोठ्या आकाराचे चौकोनी तुकडे करून घ्या.
२. फोडणी द्या - तवा गरम करून त्यावर तूप किंवा तेल घाला. त्यात मोहरी आणि उडीद डाळ घाला. मोहरी तडतडली की कढीपत्ता, आले आणि हिरवी मिरची घाला.
३. कांदा-टोमॅटो परता - आता बारीक चिरलेला कांदा घालून तो परतून घ्या. त्यात हळद आणि थोडे मीठ घाला. त्यानंतर चिरलेला टोमॅटो घालून मऊ होऊ द्या.
४. इडली मिसळा - टोमॅटो मऊ झाल्यावर इडलीचे तुकडे तव्यावर घाला. स्पॅटुलाच्या मदतीने हलक्या हाताने परता, जेणेकरून इडलीचे तुकडे तुटणार नाहीत.
५. मसाल्यांचा तडका द्या - आता सांबार मसाला आणि पावभाजी मसाला घाला. त्यासोबत भाजलेले शेंगदाणे किंवा काजू, किसलेले खोबरे आणि लिंबाचा रस घालून सर्व साहित्य हलक्या हाताने मिक्स करा.
६. बटरचा टच - शेवटी वरून बटर घाला. बटर वितळल्यानंतर चिरलेली कोथिंबीर पेरून गरमागरम तवा इडली सर्व्ह करा.
टिप्स :
या रेसिपीसाठी थंड किंवा आदल्या दिवसाची इडली वापरल्यास तुकडे व्यवस्थित राहतात.
इडली तव्यावर घातल्यानंतर जास्त परतू नका, त्यामुळे ती तुटू शकते.
स्ट्रीट-स्टाईल चव हवी असल्यास पावभाजी मसाला आणि बटरचे प्रमाण थोडे वाढवू शकता.
शेंगदाण्यांऐवजी काजू वापरल्यास चवीसोबत क्रंचही मिळतो.
तवा इडली गरमागरम सर्व्ह केल्यास तिची चव आणि मसाल्यांचा सुगंध अधिक खुलतो.
आवड असल्यास यामध्ये काही भाज्याही टाकून या डिशची चव वाढवू शकता.
