पुणे : महाराष्ट्र दिनाच्या सुट्टीच्या दिवशी मुंबई-पुणे द्रुतगती मार्गावर शुक्रवारी (दि.१) सकाळी मोठ्या प्रमाणात वाहतूक कोंडी झाली. खंडाळा घाट आणि लोणावळा परिसरात वाहनांच्या लांबच लांब रांगा लागल्याने हजारो प्रवासी तासन्तास अडकले. काही ठिकाणी वाहनांची हालचाल पूर्णपणे ठप्प झाल्याचे चित्र दिसून आले.
मुंबई-पुणे द्रुतगती मार्गावरील ही वाहतूक कोंडी अशा वेळी झाली, जेव्हा बहुप्रतीक्षित ‘मिसिंग लिंक’ प्रकल्पाचे उद्घाटन पार पडत होते. घाट विभागातील वाहतूक कमी करण्यासाठी आणि प्रवासाचा वेळ घटवण्यासाठी हा प्रकल्प महत्त्वाचा मानला जात असला, तरी प्रत्यक्षात उद्घाटनाच्या दिवशीच प्रवाशांना मोठ्या गैरसोयीचा सामना करावा लागला.
खंडाळा घाटात वाहनांची संथ गती
सकाळपासूनच मुंबईहून पुण्याच्या दिशेने जाणाऱ्या दोन्ही मार्गांवर वाहतुकीचा ताण वाढला होता. विशेषतः खंडाळा घाट आणि लोणावळा परिसरात वाहनांच्या रांगा डोंगर उतारापर्यंत पसरल्याचे दृश्य पाहायला मिळाले. अनेक प्रवाशांनी दोन तासांहून अधिक वेळ रस्त्यावर अडकून राहिल्याची माहिती दिली.
घाट विभाग पार केल्यानंतर काही प्रमाणात वाहतूक सुरळीत होत असल्याचे दिसले. मात्र,सकाळच्या गर्दीच्या वेळेत मोठा खोळंबा झाल्याने प्रवाशांमध्ये नाराजी व्यक्त करण्यात आली.
सुप्रिया सुळेही वाहतूक कोंडीत अडकल्या
खासदार सुप्रिया सुळे यांनाही या वाहतूक कोंडीचा फटका बसला. महाराष्ट्र दिनानिमित्त पुण्याकडे जात असताना त्या मुंबई-पुणे द्रुतगती मार्गावर अडकल्या. वाहतुकीची परिस्थिती दाखवण्यासाठी त्यांनी गाडीतूनच एक व्हिडिओ रेकॉर्ड केला.
या व्हिडिओमध्ये घाटात अडकलेल्या वाहनांच्या लांबलचक रांगा दिसत आहेत. याचदरम्यान, त्यांच्या शेजारी उभ्या असलेल्या एका कारचालकाने सांगितले, "सकाळी ७ वाजता ठाण्याहून निघालो, पण गेल्या दोन तासांपासून वाहतूक कोंडीत अडकलो आहे," असे म्हणत त्याने आपली व्यथा व्यक्त केली.
वाहतूक ठप्प झाल्याने प्रवाशांना मोठा त्रास सहन करावा लागत असल्याचे सुळे यांनी नमूद केले. "दीड ते दोन तासांपासून गाड्या जागेवरच उभ्या आहेत. इतका वेळ अडकल्यामुळे आसपासच्या वाहनांमधील लोकांशीही ओळखी झाल्या," अशी मिश्कील टिप्पणी त्यांनी व्हिडिओमध्ये केली.
कोंडीमागचे नेमके कारण स्पष्ट नाही
वाहतूक कोंडी नेमकी कशामुळे झाली याबाबत प्रशासनाकडून अधिकृत कारण स्पष्ट करण्यात आलेले नाही. मात्र, महाराष्ट्र दिनाची सुट्टी, सलग आलेला मोठा विकेंड आणि लोणावळा-खंडाळा परिसराकडे वाढलेला पर्यटकांचा ओघ यामुळे वाहनांची संख्या अचानक वाढल्याचे सांगितले जात आहे.
काही प्रवाशांनी सोशल मीडियावर शेअर केलेल्या माहितीनुसार, घाट विभागात वाहनांचा वेग कमी झाल्याने संपूर्ण मार्गावर साखळी स्वरूपात कोंडी निर्माण झाली.
‘मिसिंग लिंक’ प्रकल्पाकडून मोठ्या अपेक्षा
मुंबई-पुणे द्रुतगती मार्गावरील ‘मिसिंग लिंक’ प्रकल्पामुळे खंडाळा घाट टाळून प्रवासाचा वेळ सुमारे २० ते ३० मिनिटांनी कमी होण्याची अपेक्षा आहे. सुमारे १३.३ किलोमीटरचा हा मार्ग वाहतूक कोंडी कमी करण्यासाठी आणि सुरक्षित प्रवासासाठी महत्त्वाचा मानला जात आहे.
प्रशासनाकडून उपाययोजनांची मागणी
वारंवार होणाऱ्या वाहतूक कोंडीमुळे प्रवाशांकडून अधिक प्रभावी वाहतूक व्यवस्थापनाची मागणी होत आहे. अतिरिक्त पोलिस बंदोबस्त, वाहतुकीचे योग्य नियोजन आणि गर्दीच्या काळात पर्यायी व्यवस्था करण्याची गरज नागरिकांकडून व्यक्त करण्यात आली आहे.
मुंबई-पुणे द्रुतगती मार्ग हा राज्यातील सर्वाधिक वर्दळीच्या मार्गांपैकी एक मानला जातो. त्यामुळे सुट्ट्या, विकेंड आणि पर्यटन हंगामात वाहतूक नियंत्रणासाठी दीर्घकालीन नियोजनाची आवश्यकता पुन्हा एकदा अधोरेखित झाली आहे.
