नाशिकहून विदर्भात जाणाऱ्या प्रवाशांसाठी आता रोजच्या प्रवासाचा नवा पर्याय उपलब्ध झाला आहे. नाशिक रोड-बडनेरा मेमू विशेष रेल्वेवरील ‘स्पेशल’चा टॅग हटवून रेल्वे प्रशासनाने या गाडीचे नियमित सेवेत रूपांतर केले आहे. शनिवारपासून (दि. १५) ही मेमू दररोज धावणार आहे. त्यामुळे नाशिक रोडसह निफाड, लासलगाव आणि मनमाड येथील प्रवाशांना अकोला, शेगाव, भुसावळसह विदर्भातील महत्त्वाच्या शहरांशी नियमित रेल्वे जोडणी मिळणार आहे.
‘स्पेशल’चा टॅग हटला, क्रमांकही बदलले
आतापर्यंत ही मेमू विशेष रेल्वे म्हणून ०१२११ आणि ०१२१२ या क्रमांकाने चालवली जात होती. नियमित सेवेत समावेश झाल्यानंतर तिचे क्रमांकही बदलण्यात आले आहेत.
बडनेरा-नाशिक रोड गाडीला आता ६११३०, तर नाशिक रोड-बडनेरा गाडीला ६११२९ हा नियमित क्रमांक देण्यात आला आहे.
विशेष सेवेतून नियमित सेवेत झालेल्या या बदलामुळे प्रवाशांना दररोज या गाडीने प्रवास करता येणार आहे.
काय असेल वेळापत्रक?
६११३० बडनेरा-नाशिक रोड मेमू सकाळी १०.०५ वाजता बडनेरा स्थानकातून सुटेल. ती रात्री ७.४० वाजता नाशिक रोड येथे पोहोचेल.
परतीच्या प्रवासात ६११२९ नाशिक रोड-बडनेरा मेमू रात्री ९.१५ वाजता नाशिक रोडहून रवाना होईल आणि दुसऱ्या दिवशी पहाटे ५.३५ वाजता बडनेरा येथे पोहोचेल.
नाशिक जिल्ह्यातील या ४ स्थानकांना थेट फायदा
या मेमूमुळे नाशिक शहरासह जिल्ह्यातील प्रवाशांनाही मोठी सोय होणार आहे. नाशिक रोड, निफाड, लासलगाव आणि मनमाड या चार प्रमुख स्थानकांवर गाडीला थांबा देण्यात आला आहे. त्यामुळे शिक्षण, नोकरी, व्यवसाय किंवा अन्य कामांसाठी नाशिक आणि विदर्भादरम्यान नियमित प्रवास करणाऱ्यांना आणखी एक सोयीचा पर्याय उपलब्ध होणार आहे.
अकोला, शेगाव, भुसावळसह महत्त्वाची शहरं जोडली जाणार
नाशिक जिल्ह्यानंतर ही मेमू नांदगाव, चाळीसगाव, पाचोरा, जळगाव, भुसावळ, मलकापूर, शेगाव आणि अकोला या महत्त्वाच्या स्थानकांवरही थांबणार आहे. ही १२ डब्यांची मेमू असून, प्रवासादरम्यान एकूण १६ स्थानकांवर तिला थांबे असणार आहेत. त्यामुळे नाशिक ते विदर्भ या मार्गावरील अनेक शहरांमधील दैनंदिन प्रवास अधिक सुलभ होणार आहे.
नाशिक-विदर्भ प्रवासाला नवा पर्याय
नाशिकमध्ये नोकरी, शिक्षण आणि व्यवसायासाठी विदर्भातून मोठ्या संख्येने प्रवासी ये-जा करतात. त्याचप्रमाणे नाशिकमधूनही जळगाव, भुसावळ, शेगाव, अकोला आणि पुढे विदर्भात जाणाऱ्यांची संख्या मोठी आहे.
आतापर्यंत विशेष सेवा म्हणून धावणारी ही मेमू आता नियमित झाल्याने प्रवाशांना रोज उपलब्ध असलेला रेल्वे पर्याय मिळणार आहे. विशेषतः निफाड, लासलगाव आणि मनमाड परिसरातील प्रवाशांसाठी नाशिक आणि विदर्भादरम्यानची ही थेट जोडणी अधिक उपयुक्त ठरणार आहे.
