मुंबई : चेंबूर परिसरात मंगळवारी शाळेतून घरी परतणाऱ्या विद्यार्थ्यांच्या बसवर अचानक मोठे झाड कोसळून भीषण अपघात झाला. या दुर्घटनेत १० विद्यार्थी गंभीर जखमी झाले असून, एका विद्यार्थ्याला बसमधून बाहेर काढण्यासाठी बचावकार्य सुरू आहे. अग्निशमन दल आणि आपत्कालीन पथके घटनास्थळी दाखल झाली असून, जखमी विद्यार्थ्यांना तातडीने जवळच्या रुग्णालयात दाखल करण्यात आले आहे.
बसवर कोसळले मोठे झाड
माहितीनुसार, ही घटना चेंबूरमधील रोड क्रमांक ११ येथे घडली. अपघाताच्या वेळी बसमध्ये एकूण १३ विद्यार्थी प्रवास करत होते. झाड अचानक बसवर कोसळल्याने बसचे मोठे नुकसान झाले आणि विद्यार्थ्यांमध्ये भीती पसरली.
जखमींवर उपचार सुरू
अपघातात जखमी झालेल्या काही विद्यार्थ्यांना जैन रुग्णालयात दाखल करण्यात आले असून, त्यापैकी काहींची प्रकृती गंभीर असल्याचे सांगितले जात आहे. तर चार विद्यार्थ्यांवर झेन रुग्णालयात उपचार सुरू आहेत. बसमध्ये अडकलेल्या एका विद्यार्थ्याला बाहेर काढण्यासाठी बचाव पथकाने झाड कापून सुटका मोहीम राबवली.
स्थानिकांचा BMC वर निष्काळजीपणाचा आरोप
या घटनेनंतर स्थानिक नागरिकांनी बृहन्मुंबई महानगरपालिकेवर (BMC) निष्काळजीपणाचा आरोप केला आहे. परिसरातील धोकादायक झाडांची छाटणी किंवा हटविण्याबाबत अनेक वेळा लेखी तक्रारी करूनही कोणतीही कारवाई करण्यात आली नसल्याचा दावा रहिवाशांनी केला. यापूर्वीही या भागात अशाच प्रकारच्या घटना घडल्याचे त्यांनी सांगितले.
मुंबईत मुसळधार पावसाचा इशारा
भारतीय हवामान विभागाने (IMD) मुंबई आणि उपनगरांसाठी मुसळधार पाऊस, मेघगर्जना आणि जोरदार वाऱ्याचा अंदाज वर्तवला आहे. या पार्श्वभूमीवर नागरिकांनी सतर्क राहण्याचे आवाहन करण्यात आले आहे.
