मुंबईत बेस्टच्या अपघातांची मालिका सुरू असतानाच गुरुवारी (दि. २३) आणखी एक अपघाताची घटना समोर आली आहे. पवई येथे बेस्टच्या इलेक्ट्रिक बसने रस्त्यावरील दुभाजकाला धडक दिल्याने सात प्रवासी जखमी झाले. या अपघातानंतर जखमींना तातडीने रुग्णालयात दाखल करण्यात आले असून, प्राथमिक चौकशीत चालकाने एका कारकडे लक्ष गेल्यामुळे हा अपघात झाल्याचे सांगितले आहे.
पवईत सकाळी अपघात
बेस्ट प्रशासनाने दिलेल्या माहितीनुसार, हा अपघात गुरुवारी सकाळी ११.०५ वाजण्याच्या सुमारास पवई विहार संकुलाजवळ घडला. विक्रोळी डेपोतून वांद्रे (पश्चिम) बस स्थानकाकडे जाणारी ए-४२२/३६ मार्गावरील इलेक्ट्रिक बस (क्रमांक ८६८८) नियमित फेरीवर असताना अचानक दुभाजकावर जाऊन आदळली.
चालकाने काय सांगितले?
प्राथमिक चौकशीत चालकाने सांगितले की, बस चालवत असताना डाव्या बाजूने एक कार येत असल्याचे त्याच्या लक्षात आले. त्या कारकडे लक्ष गेल्यामुळे बसवरील नियंत्रण सुटले आणि बस उजव्या बाजूला वळत थेट रस्त्यावरील दुभाजकावर आदळली.
सात प्रवासी जखमी
या अपघातात बसमधील सात प्रवासी जखमी झाले. अपघातानंतर वाहकाच्या मदतीने सर्व जखमींना साकीनाका येथील पॅरामाउंट रुग्णालयात उपचारासाठी दाखल करण्यात आले असून जखमींची प्रकृती आता स्थिर असल्याचे सांगण्यात आले आहे.
चौकशी सुरू
अपघाताची माहिती मिळताच बेस्टचे वरिष्ठ अधिकारी घटनास्थळी दाखल झाले. चालकाचा जबाब, रस्त्यावरील परिस्थिती, सीसीटीव्ही फुटेज तसेच इतर तांत्रिक बाबींची तपासणी केली जात आहे. अपघाताचे नेमके कारण चौकशीनंतर स्पष्ट होणार असल्याचे बेस्ट प्रशासनाने सांगितले आहे. दरम्यान, अपघातामुळे काही काळ पवई परिसरातील वाहतुकीवर परिणाम झाला होता.
