मुंबईतील वांद्रे परिसरातून कथितरीत्या अपहरण करण्यात आलेल्या दोन अल्पवयीन मुलींची मुंबई पोलिसांनी उत्तराखंडमधून सुखरूप सुटका केली आहे. या प्रकरणात आरोपीला अटक करण्यात आली असून, तांत्रिक तपास, डिजिटल ट्रॅकिंगच्या माध्यमातून ही कारवाई करण्यात आल्याची माहिती मुंबई पोलिसांनी दिली आहे.
अंगणात खेळत असताना दोन्ही मुली बेपत्ता
मुंबई पोलिसांनी दिलेल्या माहितीनुसार, वांद्रे येथील घराबाहेरील अंगणात खेळत असताना दोन्ही अल्पवयीन मुली अचानक बेपत्ता झाल्या. त्यानंतर त्यांच्या कुटुंबीयांनी बीकेसी पोलीस ठाण्यात अपहरणाची तक्रार दाखल केली.
प्राथमिक तपासात कोणताही ठोस धागादोरा हाती न लागल्याने पोलिसांनी तातडीने व्यापक शोधमोहीम सुरू केली. यामध्ये तांत्रिक तपास, डिजिटल ट्रॅकिंग आणि अन्य आधुनिक साधनांचा वापर करण्यात आला.
नालासोपाऱ्यातून उत्तराखंडपर्यंत शोध
तपासादरम्यान सर्वप्रथम दोन्ही मुलींचा माग नालासोपाऱ्यापर्यंत लागला. त्यानंतर पोलिसांनी त्यांच्या हालचालींचा मागोवा घेत उत्तराखंडपर्यंत पोहोचत दोन्ही मुलींची सुखरूप सुटका केली. या कारवाईदरम्यान आरोपीलाही अटक करण्यात आली.
अपहरणामागील कारणाचा शोध सुरू
वरिष्ठ अधिकाऱ्यांच्या मार्गदर्शनाखाली आणि तांत्रिक कौशल्याच्या मदतीने ही कारवाई यशस्वी करण्यात आली. अपहरणामागील नेमका हेतू काय होता आणि मुलींना एका राज्यातून दुसऱ्या राज्यात का नेण्यात आले, याचा तपास सध्या सुरू आहे.
मुंबई पोलिसांनी सांगितले की, आधुनिक तंत्रज्ञान आणि विविध राज्यांतील पोलिसांमधील समन्वयाच्या मदतीने अपहरण आणि बेपत्ता मुलांच्या प्रकरणांचा तपास अधिक प्रभावीपणे करता येत आहे. या प्रकरणात पुढील कायदेशीर कारवाई सुरू असून तपासही सुरू आहे.
दरम्यान, यापूर्वीही मुंबई महानगर प्रदेशातील अशाच एका प्रकरणात दिवा येथून बेपत्ता झालेल्या सात वर्षीय मुलीचा शोध घेण्यासाठी पोलिसांनी तब्बल ९४८ सीसीटीव्ही कॅमेऱ्यांचे फुटेज तपासले होते. त्यानंतर त्या मुलीला बदलापूरमधून सुखरूप शोधण्यात पोलिसांना यश आले होते.
