मुंबई : पंतप्रधान नरेंद्र मोदी यांच्या कार्यक्रमापूर्वी मुंबईतील वांद्रे-कुर्ला संकुलातील (BKC) नीता मुकेश अंबानी कल्चरल सेंटरमध्ये (NMACC) सुरक्षा यंत्रणांना सतर्क करणारी घटना घडली. सोमवारी 'ग्लोबल फिनटेक फेस्ट'च्या कार्यक्रमस्थळी PMO अधिकारी असल्याचे भासवून बनावट ओळखपत्राच्या आधारे प्रवेश करण्याचा प्रयत्न करणाऱ्या २४ वर्षीय रोहन पारिखसह दोन तरुणांना मुंबई पोलिसांनी ताब्यात घेतले होते. त्यांना मंगळवारी (दि. ८) अटक करण्यात आली. रोहनसोबत असलेल्या कथित बॉडीगार्डकडे बंदूक आढळून आल्याने खळबळ उडाली. बनावट PMO ओळखपत्र का तयार करण्यात आले आणि शस्त्रधारी बॉडीगार्डला सोबत आणण्यामागे नेमका उद्देश काय होता, याचा तपास मुंबई गुन्हे शाखेकडून सुरू आहे.
PMO अधिकारी असल्याचा दावा
पंतप्रधान नरेंद्र मोदी 'ग्लोबल फिनटेक फेस्ट'साठी NMACC मध्ये येणार आहेत. त्याआधी सोमवारी संध्याकाळी रोहन पारिख हा स्वतःला PMO अधिकारी असल्याचे सांगत कार्यक्रमाच्या मुख्य ठिकाणी प्रवेश करण्याचा प्रयत्न करत होता. मात्र, पंतप्रधानांच्या सुरक्षेबाबत सतर्क असलेल्या केंद्रीय सुरक्षा यंत्रणा आणि मुंबई पोलिसांनी त्याला रोखले.
सुरक्षा तपासणीदरम्यान रोहनकडे त्याचे छायाचित्र असलेले PMO चे ओळखपत्र आढळले. मात्र, तपास केल्यानंतर हे ओळखपत्र बनावट असल्याचे स्पष्ट झाले. त्यानंतर रोहनला ताब्यात घेण्यात आले.
बॉडीगार्डकडे बंदूक
रोहनसोबत एक तरुण बॉडीगार्ड म्हणून वावरत असल्याचेही पोलिसांच्या निदर्शनास आले. त्याची झडती घेतली असता त्याच्याकडे बंदूक आढळली. पोलिसांनी ही बंदूक ताब्यात घेतली आहे.
मात्र, संबंधित बंदूक परवानाधारक होती की नाही, याचा तपास अजून झालेला नाही. त्यामुळे तपास पूर्ण होईपर्यंत या शस्त्राबाबत अधिक माहिती समोर येणे अपेक्षित आहे.
काल ताब्यात, आज अटक
या प्रकरणी सुरुवातीला दोन्ही तरुणांना ताब्यात घेऊन चौकशी करण्यात आली. त्यानंतर मंगळवारी दोघांना अटक करण्यात आली असून, याप्रकरणी वांद्रे-कुर्ला संकुल पोलीस ठाण्यात गुन्हा दाखल करण्यात आला आहे.
बनावट ID आणि बंदूक का आणली?
रोहन पारिखने बनावट PMO ओळखपत्र का तयार केले? तसेच त्याच्यासोबत शस्त्रधारी अंगरक्षक कार्यक्रमस्थळी का आला होता, याचा तपास पोलिसांकडून सुरू आहे. दोन्ही तरुणांची कसून चौकशी केली जात आहे.
मुंबई पोलिसांच्या गुन्हे शाखेचे विशेष पथक या प्रकरणाचा पुढील तपास करत आहे. कार्यक्रमस्थळी प्रवेश करण्यामागे नेमका उद्देश काय होता आणि दोघांनी यापूर्वीही अशा प्रकारे प्रवेशाचा प्रयत्न केला होता का, याचाही तपास केला जात आहे.
मोदींच्या सुरक्षेच्या पार्श्वभूमीवर गंभीर बाब
पंतप्रधान नरेंद्र मोदी ज्या कार्यक्रमाला उपस्थित राहणार आहेत, त्याच ठिकाणी बनावट PMO ओळखपत्राच्या आधारे प्रवेशाचा प्रयत्न आणि सोबतच्या व्यक्तीकडे बंदूक आढळणे ही सुरक्षा यंत्रणांसाठी गंभीर बाब मानली जात आहे. केंद्रीय सुरक्षा यंत्रणा आणि मुंबई पोलिसांच्या सतर्कतेमुळे दोन्ही तरुणांना प्रवेश करण्यापूर्वीच रोखण्यात आले.
पंतप्रधान नरेंद्र मोदी यांचा मुंबई दौरा
‘ग्लोबल फिनटेक फेस्ट २०२६’च्या निमित्ताने पंतप्रधान नरेंद्र मोदी मंगळवारी एक दिवसाच्या मुंबई दौऱ्यावर येत आहेत. वांद्रे-कुर्ला संकुलात आयोजित करण्यात आलेल्या ‘ग्लोबल फिनटेक फेस्ट’चे मोदी यांच्या हस्ते उद्घाटन होणार आहे. मुंबईत ८ ते ११ सप्टेंबर २०२६ या कालावधीत ‘ग्लोबल फिनटेक फेस्ट २०२६’ या सातव्या परिषदेचे आयोजन करण्यात आले असून उद्घाटन सोहळ्यानंतर पंतप्रधान उपस्थितांना संबोधित करतील.
यंदाचे फेस्टीव्हल हे एजेंटिक एआय, टोकेनायझेशन, क्वांटम या मध्यवर्ती संकल्पनेवर आधारीत असणार आहे. डिजिटल पेमेंट आणि आर्थिक समावेशनामध्ये भारताचे जागतिक नेतृत्व अधिक दृढ करणे, हा यामागील प्रमुख उद्देश आहे. या परिषदेत धोरण, नियमन, तंत्रज्ञान, भांडवल आणि उद्योग या सर्व घटकांना एकाच व्यासपीठावर आणले जाणार आहे.
