मुंबई : आकर्षक सजावट, उंच गणेशमूर्ती आणि भव्य-दिव्य उत्सवासाठी मुंबईचा गणेशोत्सव प्रसिद्ध आहे. मात्र, यंदा या भव्यतेपेक्षा अगदी वेगळ्या असलेल्या अवघ्या एक इंचच्या चिमुकल्या बाप्पाने सर्वांचे लक्ष वेधून घेतले आहे. मालाडमधील एका गणपती मंडळात शिवलिंगामध्ये विराजमान असलेली ही छोटी गणेशमूर्ती भाविकांसाठी कुतूहलाचा विषय ठरत असून, तिचे फोटो आणि व्हिडीओ सोशल मीडियावरही व्हायरल होत आहेत.
अवघ्या १ इंचाच्या बाप्पाची ओळख
मालाडमधील 'धनजीवाडीचा धनराज' म्हणून ओळखल्या जाणाऱ्या गणपती मंडळात ही चिमुकली गणेशमूर्ती साकारण्यात आली आहे. ही मूर्ती अवघी एक इंच उंच असल्याचे सांगितले जात आहे. त्यामुळे शहरातील मोठ्या आणि भव्य गणेशमूर्तींपेक्षा या बाप्पाचे रूप यंदाच्या गणेशोत्सवात विशेष ठरत आहे.
शिवलिंगात विराजमान बाप्पा
या मंडळाची सजावटही तितकीच आकर्षक आहे. मंडपात प्रवेश केल्यानंतर भाविकांना सुरुवातीला चांदीच्या अलंकारांनी सजवलेली तुलनेने मोठी गणेशमूर्ती दिसते. मात्र, तिच्या शेजारीच या चिमुकल्या बाप्पाचे खास स्थान तयार करण्यात आले आहे.
एका शिवलिंगामध्ये छोटीशी जागा करण्यात आली असून, त्यातून डोकावून पाहिल्यानंतर भाविकांना एक इंचाचा बाप्पा दिसतो. ही गणेशमूर्ती नंदीवर विराजमान असल्याचे दाखवण्यात आले आहे. भगवान शिव आणि गणपतीशी संबंधित घटकांचा संगम साधत हा अनोखा देखावा साकारण्यात आला आहे.
कैलास पर्वताचा देखावा
चिमुकल्या बाप्पाला भगवान शिवाचे रूप देण्यात आले असून, त्याच्या आजूबाजूला कैलास पर्वताचे वातावरण उभे करण्यात आले आहे. तसेच, कापसाचा वापर करून आकाशाचा देखावा तयार करण्यात आला आहे. त्यामुळे अवघ्या काही इंचांच्या जागेत साकारलेला हा छोटासा देखावा अधिक आकर्षक दिसतो.
मोबाईलमधून घ्यावे लागते दर्शन
गणेशमूर्तीचा आकार अतिशय लहान असल्याने ती उघड्या डोळ्यांनी स्पष्टपणे पाहणे काहीसे कठीण आहे. त्यामुळे भाविक मोबाईलच्या ३ पट डिजिटल झूमचा वापर करून या चिमुकल्या बाप्पाचे दर्शन घेत असल्याचे सांगितले जात आहे. बाप्पाचे बारकाईने दर्शन घेण्यासाठी भाविकांमध्येही उत्सुकता पाहायला मिळत आहे.
मंडळापर्यंत कसे पोहोचाल?
या अनोख्या बाप्पाचे दर्शन घेण्यासाठी भाविक मालाड रेल्वे स्थानकावर उतरू शकतात. पश्चिम रेल्वे मार्गावरील मालाड स्थानकाच्या पूर्वेकडील बाहेर पडण्याच्या मार्गाने बाहेर आल्यानंतर धनजीवाडी, राणी सती रोड आणि कासम बाग परिसरात रिक्षा किंवा कॅबने पोहोचता येते.
