मुंबई : गोरेगावमधील एका इमारतीच्या सहाव्या मजल्यावरून पडून दीड वर्षांच्या चिमुकलीचा मृत्यू झाल्याच्या प्रकरणाला आता नवे वळण मिळाले आहे. चिमुकलीला जिन्याच्या मोकळ्या जागेतून खाली फेकल्याचा आरोप तिच्या आईने केला आहे. या तक्रारीच्या आधारे दिंडोशी पोलिसांनी घटनेनंतर चार दिवसांनी शेजारी राहणाऱ्या १० वर्षीय मुलीविरुद्ध हत्येचा गुन्हा दाखल केला आहे. १४ ऑक्टोबर रोजी घडलेल्या या घटनेमुळे परिसरात खळबळ उडाली आहे.
आईच्या तक्रारीनंतर पोलिसांची कारवाई
माहितीनुसार, बुधवारी (दि.१४) रात्री गोरेगावमधील एका इमारतीच्या सहाव्या मजल्यावर ही घटना घडली. चिमुकली आपल्या घराबाहेरील सामायिक कॉरिडॉरमध्ये एका मांजरीसोबत खेळत होती. काही वेळाने ती आजूबाजूला दिसत नसल्याचे आईच्या लक्षात आले. तेव्हा तिने आपल्या १२ वर्षांच्या मुलाला बहिणीचा शोध घेण्यास सांगितले. मात्र, त्यालाही ती सापडली नाही. त्याने जिन्याच्या मोकळ्या जागेतून खाली पाहिले असता, तळमजल्याखालील भागात कोणीतरी पडल्याचे त्याला दिसले. अंगावरील कपडे बहिणीच्या कपड्यांसारखे असल्याचे लक्षात येताच त्याने आईला याची माहिती दिली.
दरम्यान, इमारतीतील रहिवाशांना चिमुकली जखमी अवस्थेत आढळली. त्यांनी तिला तातडीने महापालिकेच्या रुग्णालयात दाखल केले. मात्र, डॉक्टरांनी तिला मृत घोषित केले.
सीसीटीव्ही फुटेजचा आईच्या तक्रारीत उल्लेख
चिमुकलीच्या आईने पोलिसांना दिलेल्या जबाबात इमारतीच्या सहाव्या मजल्यावरील सुरक्षा कठडा सुमारे साडेतीन फूट उंच असल्याचे नमूद केले आहे. त्यामुळे मुलीचा तोल जाऊन ती खाली पडली असण्याची शक्यता नसल्याचे तिने म्हटले आहे. तसेच, सीसीटीव्ही फुटेज तपासल्यानंतर १० वर्षीय शेजारील मुलीने चिमुकलीला खुणावून लिफ्टजवळ बोलावल्याचे दिसल्याचा दावाही तिने तक्रारीत केला आहे.
आईच्या आरोपानुसार, चिमुकली जवळ आल्यानंतर संबंधित मुलीने तिला उचलून लिफ्टजवळील जिन्याच्या मोकळ्या जागेतून खाली फेकले. त्यानंतर ती तेथून निघून गेल्याचेही आईने आपल्या जबाबात म्हटले आहे. या तक्रारीच्या आधारे पोलिसांनी सुरुवातीला अपघाती मृत्यूची नोंद केलेल्या प्रकरणात आता खुनाचा गुन्हा दाखल केला आहे.
बाल न्याय मंडळाकडून समुपदेशनाची सूचना
चिमुकलीच्या मृत्यूनंतर पोलिसांनी १० वर्षीय मुलीला बाल न्याय मंडळासमोर (JJB) हजर केले होते. मुलीचे समुपदेशन करणे आवश्यक असल्याचे मंडळाने सांगितले. त्यानुसार, एका स्वयंसेवी संस्थेची नियुक्ती करण्यात आली असून, त्यानंतर मुलीला तिच्या पालकांच्या ताब्यात देण्यात आले.
माहितीनुसार, घटनेनंतर संबंधित मुलीचे कुटुंब इमारतीतील घर सोडून नातेवाइकांकडे राहायला गेले आहे. चिमुकलीच्या मृत्यूच्या अवघ्या दोन आठवड्यांपूर्वी हे कुटुंब संबंधित गृहनिर्माण सोसायटीत राहायला आले होते.
शिक्षेपेक्षा पुनर्वसनावर भर देण्याची गरज
कायद्यानुसार, सात वर्षांखालील मुलाला फौजदारी जबाबदारीतून सूट असते. सात ते १२ वर्षे वयोगटातील मुलाच्या बाबतीत, त्याच्या कृतीचे स्वरूप आणि परिणाम समजण्याची पुरेशी परिपक्वता होती की नाही, हा मुद्दा महत्त्वाचा ठरतो. त्यामुळे या प्रकरणातही संबंधित मुलीचे वय आणि कायद्यातील तरतुदी लक्षात घेऊन पुढील प्रक्रिया केली जाईल. त्यामुळे या प्रकरणातील पुढील तपास आणि कायदेशीर प्रक्रिया महत्त्वाची ठरणार आहे.
