नवी दिल्ली : राष्ट्रीय पात्रता प्रवेश परीक्षा म्हणजेच नीट-यूजी २०२६ च्या पेपरफुटी प्रकरणातील मुख्य संशयित आरोपी आणि राष्ट्रीय परीक्षा एजन्सीची पॅनेलिस्ट मनीषा मांढरे हिला दिल्लीतील राऊस एव्हेन्यू न्यायालयाने १४ दिवसांची सीबीआय कोठडी सुनावली आहे.
वनस्पतीशास्त्राची अध्यापिका असलेल्या मांढरे हिने मनीषा वाघमारे आणि प्रल्हाद विठ्ठलराव कुलकर्णी या सहआरोपींच्या मदतीने निवडक विद्यार्थ्यांना मोठ्या रक्कमेच्या मोबदल्यात परीक्षेचे प्रश्न आणि मजकूर पुरवल्याचा आरोप आहे. या खळबळजनक प्रकरणातील मोठा कट आणि पेपरफुटीचा मुख्य स्रोत शोधण्यासाठी सीबीआयने न्यायालयाकडे मांढरे हिच्या कोठडीची मागणी केली होती. विशेष न्यायाधीश कोलेट रश्मी कुजूर यांनी ती मान्य केली. मांढरे हिला मथुरा येथील एका हॉटेलमधून अटक करण्यात आली असून तिला ३० मे रोजी पुन्हा न्यायालयात हजर केले जाईल.
सीबीआयने न्यायालयात सांगितले की, या संघटित पेपरफुटी टोळीत अनेक सक्रिय सदस्य सामील असून त्यांची ओळख पटवून अटक करणे अद्याप बाकी आहे. मनीषा मांढरे ही एनटीएच्या पॅनेलवरील तज्ज्ञ असल्याने प्रश्नपत्रिका तयार करण्याच्या प्रक्रियेत तिला अंतिम प्रश्नसंचाची माहिती मिळाली होती. तिचा वापर तिने आर्थिक फायद्यासाठी घेतला. या प्रकरणात आतापर्यंत एकूण ८ आरोपींना अटक करण्यात आली आहे. सीबीआयच्या वतीने वरिष्ठ सरकारी वकील व्ही. के. पाठक आणि दर्शन लाल यांनी युक्तिवाद केला की, गुन्ह्याचे स्वरूप आणि डिजिटल पुरावे गोळा करण्यासाठी आरोपीला देशाच्या विविध भागांत घेऊन जाणे आवश्यक आहे.
दुसरीकडे, आरोपीच्या वकिलांनी या कोठडीला तीव्र विरोध केला. मनीषा मांढरे हिचे वय सुमारे ५७ वर्षे असून ती पेशाने व्याख्याती असून तिने तपासात पूर्ण सहकार्य केले असल्याचा दावा वकिलांनी केला. आरोपीला यापूर्वी तीन दिवस कोठडीत ठेवण्यात आले होते आणि तिच्या घरातून काहीही जप्त करण्यात आलेले नाही, त्यामुळे १४ दिवसांच्या कोठडीची गरज नाही, असा युक्तिवाद बचाव पक्षाने केला. न्यायालयाने दोन्ही बाजू ऐकून घेतल्यानंतर वैद्यकीय तपासणीच्या अटीवर मांढरे हिला सीबीआय कोठडीत पाठवण्याचे आदेश दिले. तसेच या प्रकरणाशी संबंधित सीसीटीव्ही फुटेज जतन करण्याच्या अर्जावर न्यायालयाने सीबीआयकडून उत्तर मागवले आहे.
