रेल्वेत नोकरीच्या शोधात असलेल्या तरुणांसाठी महत्त्वाची बातमी आहे. रेल्वे भरती मंडळाने (RRB) ज्युनियर इंजिनिअर (JE), डेपो मटेरियल सुपरिंटेंडेंट (DMS) आणि केमिकल अँड मेटलर्जिकल असिस्टंट (CMA) पदांसाठी भरती जाहीर केली आहे. या भरतीअंतर्गत एकूण ३,९९३ रिक्त पदे भरली जाणार आहेत. अर्ज प्रक्रिया १४ ऑगस्ट २०२६पासून सुरू झाली असून पात्र उमेदवारांना १३ सप्टेंबर २०२६पर्यंत अर्ज करता येणार आहे.
कोणकोणत्या पदांसाठी भरती?
या भरतीमध्ये विविध अभियांत्रिकी आणि तांत्रिक विभागातील पदांचा समावेश आहे.
इंजिनिअरिंग – १,६३८ पदे
मेकॅनिकल – १,१२५ पदे
इलेक्ट्रिकल – ५९९ पदे
स्टोअर्स – ३२४ पदे
एस अँड टी – ३०७ पदे
प्रवर्गनिहाय पाहिल्यास १,६९९ पदे खुल्या प्रवर्गासाठी, ६२४ एससी, ३६३ एसटी, ९१३ ओबीसी आणि ३९४ ईडब्ल्यूएस प्रवर्गासाठी आहेत.
शैक्षणिक पात्रता काय?
ज्युनियर इंजिनिअर (JE) पदासाठी संबंधित अभियांत्रिकी शाखेतील मान्यताप्राप्त संस्थेचा ३ वर्षांचा डिप्लोमा किंवा बीई/बीटेक पदवी आवश्यक आहे.
डेपो मटेरियल सुपरिंटेंडेंट (DMS) पदासाठी कोणत्याही अभियांत्रिकी शाखेतील ३ वर्षांचा डिप्लोमा आवश्यक आहे.
अभियांत्रिकीच्या संबंधित शाखांमध्ये सिव्हिल, मेकॅनिकल, इलेक्ट्रिकल, इलेक्ट्रॉनिक्स, कॉम्प्युटर आदी शाखांचा समावेश आहे. अंतिम परीक्षेचा निकाल अद्याप लागलेला नसलेल्या उमेदवारांना या भरतीसाठी पात्र मानले जाणार नाही.
वयोमर्यादा किती?
१ जानेवारी २०२७ रोजी उमेदवाराचे वय १८ ते ३३ वर्षांच्या दरम्यान असणे आवश्यक आहे. आरक्षित प्रवर्गांना नियमानुसार वयोमर्यादेत सवलत मिळेल. एससी/एसटी उमेदवारांना ५ वर्षे, तर ओबीसी-एनसीएल उमेदवारांना ३ वर्षांची सवलत लागू आहे. इतर पात्र प्रवर्गांसाठीही नियमानुसार सवलत दिली जाईल.
अर्जासाठी महत्त्वाच्या तारखा
अर्ज सुरू : १४ ऑगस्ट २०२६
अर्जाची अंतिम तारीख : १३ सप्टेंबर २०२६, रात्री ११.५९ वाजेपर्यंत
अर्ज शुल्क भरण्याची अंतिम तारीख : १५ सप्टेंबर २०२६
अर्ज दुरुस्तीची मुदत : १६ ते २५ सप्टेंबर २०२६
स्क्राइबची माहिती देण्याची मुदत : २६ ते ३० सप्टेंबर २०२६
CBT-1 परीक्षा : तारीख नंतर जाहीर केली जाणार
अर्ज शुल्क किती?
खुल्या, ओबीसी आणि ईडब्ल्यूएस प्रवर्गातील उमेदवारांसाठी ५०० रुपये अर्ज शुल्क आहे. CBT-1 परीक्षेला उपस्थित राहिल्यानंतर त्यापैकी ४०० रुपये परत केले जातील.
एससी, एसटी, महिला, दिव्यांग, माजी सैनिक, अल्पसंख्याक आणि ईबीसी प्रवर्गातील उमेदवारांसाठी २५० रुपये शुल्क असून CBT-1 ला उपस्थित राहिल्यानंतर संपूर्ण रक्कम परत केली जाईल.
अर्ज कसा करायचा?
पात्र उमेदवारांनी अधिकृत RRB अर्ज पोर्टलवर जाऊन प्रथम नोंदणी करावी. त्यानंतर संबंधित RRB झोन, पद आणि शाखेची निवड करून वैयक्तिक, शैक्षणिक आणि प्रवर्गाची माहिती भरावी. आवश्यक कागदपत्रे, फोटो आणि स्वाक्षरी अपलोड करून ऑनलाइन शुल्क भरावे. अर्ज सबमिट केल्यानंतर कन्फर्मेशन पेज डाउनलोड करून जतन करणे महत्त्वाचे आहे.
(महत्त्वाचे : अर्ज करण्यापूर्वी संबंधित RRBची अधिकृत जाहिरात आणि पात्रता अटी काळजीपूर्वक तपासा.)
