केंद्रीय अन्वेषण विभागाने (CBI) १७,००० कोटी रुपये बँक कर्ज फसवणूक प्रकरणी उद्योगपती अनिल अंबानी यांच्यावर कारवाई केली आहे. शनिवारी (दि.२३) सकाळी CBI च्या अधिकाऱ्यांनी मुंबईतील कफ परेड येथील सीविंड अपार्टमेंटमधील त्यांच्या घरावर छापा टाकला. सकाळी सातच्या सुमारास तपास अधिकाऱ्यांनी अंबानी आणि त्यांच्या कुटुंबीयांच्या उपस्थितीच घराची झाडाझडती घेतली.

SBI ने १३ जून रोजी आरकॉम व अनिल अंबानी यांच्यावर फसवणूक केल्याचा आरोप केल्यानंतर या प्रकरणाला सुरुवात झाली. त्यानंतर २४ जून रोजी बँकेने RBI ला याबाबत अहवाल दिला. २४ जुलै रोजी, ED ने येस बँक कर्ज घोटाळा आणि मनी लाँड्रिंग प्रकरणी अंबानी यांच्या कंपन्यांशी संबंधित अनेक ठिकाणी छापे टाकले. ED च्या प्राथमिक तपासात येस बँकेने दिलेले सुमारे ३,००० कोटी रुपयांच्या कर्जाचा गैरवापर झाल्याचे समोर आले. यामुळे ED ने त्यांना चौकशीसाठी समन्स बजावला. त्यानंतर ५ ऑगस्ट रोजी सुमारे १० तास अंबानींची ED कडून चौकशी करण्यात आली.

येस बँकेकडून घेतलेल्या कर्जातील निधी शेल कंपन्यांच्या माध्यमातून गैरवापर केल्याची शंका ED ला आहे. या अनियमित व्यवहारांची चौकशी सुरू असतानाच आता CBI ने देखील अंबानींच्या घरावर छापेमारी केली आहे. यामुळे अनिल अंबानी यांच्या अडचणीत पुन्हा एकदा वाढ झाली आहे.