नवी दिल्ली : प्रवासी कारसह विविध प्रयोगांमध्ये वापरल्या जाणाऱ्या दुर्मिळ पृथ्वी चुंबकांच्या आयातीसाठी चीन सरकारकडून मंजुरी जलद मिळण्यासाठी वाहन उद्योगाने सरकारला साकडे घातले आहे.
उद्योग सूत्रांनुसार, विविध देशांतर्गत पुरवठादारांनी चीनमधील त्यांच्या स्थानिक विक्रेत्यांद्वारे चीन सरकारकडून मंजुरी मागितली आहे. तथापि, अद्याप कोणतीही मान्यता मिळालेली नाही, असे सूत्रांनी सांगितले. वाहन, गृह उपकरणे आणि स्वच्छ ऊर्जा यासह अनेक क्षेत्रांमध्ये वापरल्या जाणाऱ्या चुंबकांचे जागतिक प्रक्रिया क्षमतेच्या ९० टक्क्यांहून अधिक चीन नियंत्रित करतो.
चीन सरकारने ४ एप्रिलपासून निर्बंध लादले आहेत. सात दुर्मिळ घटक आणि संबंधित चुंबकांसाठी विशेष निर्यात परवाने अनिवार्य केले आहेत. जपानमध्ये, चीनच्या निर्बंधांमुळे सुझुकी मोटरने आधीच त्यांच्या स्विफ्ट कारचे उत्पादन स्थगित केले आहे. गेल्या आठवड्यात, मारुती सुझुकी इंडियाचे वरिष्ठ कार्यकारी अधिकारी (कॉर्पोरेट अफेयर्स) राहुल भारती म्हणाले की, चीनने भारत सरकारने मान्यता दिलेल्या आणि चीन सरकारने मंजूर केलेल्या अंतिम वापरकर्ता प्रमाणपत्राची मागणी केली आहे. म्हणून ती प्रक्रिया सुरू आहे आणि उद्योग सरकारशी चर्चा करत आहेत, असे त्यांनी सांगितले.
डेलॉइट इंडियाचे भागीदार आणि ऑटोमोटिव्ह सेक्टर लीडर रजत महाजन यांनी नमूद केले की, ही कमतरता पुरवठा साखळीतील एक प्रमुख व्यत्यय आहे, विशेषतः ईव्हीसाठी कारण दुर्मिळ पृथ्वी धातू इलेक्ट्रिक मोटरमध्ये मोठ्या प्रमाणात वापरल्या जातात.