मुंबई : आता होऊ दे धिंगाणाच्या तिन्ही पर्वांना प्रेक्षकांनी भरभरून प्रेम दिले. रोजच्या धकाधकीच्या जीवनात निखळ मनोरंजनाचे क्षण घेऊन येणारा हा कार्यक्रम फक्त महाराष्ट्रातच नाही तर सातासमुद्रापलीकडेही आवडीने पाहिला जातो. प्रेक्षकांचा हा लाडका कार्यक्रम चौपट मजा आणि चौपट धमाल घेऊन पुन्हा धिंगाणा घालण्यासाठी सज्ज झालाय. ९ ऑगस्टपासून रात्री ९ वाजता आता ‘होऊ दे धिंगाणा’चे चौथे पर्व सुरू होत आहे.
एनर्जेटिक सुपरस्टार आणि सर्वांचा लाडका होस्ट आणि दोस्त सिद्धार्थ जाधव या कार्यक्रमाच्या माध्यमातून पुन्हा एकदा धिंगाणा घालण्यासाठी सज्ज आहे.
चौथ्या पर्वाविषयी सांगताना सिद्धार्थ जाधव म्हणाला, ‘तुमचा कार्यक्रम कधी बंद होणार यापेक्षा तुमचा कार्यक्रम कधी सुरू होतोय याची जेव्हा प्रेक्षकांकडून विचारणा होते तेव्हा तेच त्या कार्यक्रमाचे यश असते. मी स्वप्नातही विचार केला नव्हता की इतके यश आता ‘होऊ दे धिंगाणा’ला मिळेल.
या कार्यक्रमाचा चौथा सीझन करताना अतिशय आनंद आणि अभिमान वाटतोय. याचं श्रेय स्टार प्रवाह वाहिनी आणि आता होऊ दे धिंगाणाच्या संपूर्ण टीमला जातंय. प्रेक्षकांप्रमाणेच मी सुद्धा या पर्वाची वाट पहात होतो. नवी ऊर्जा घेऊन हा कार्यक्रम लवकरच भेटीला येतोय. आता होऊ दे धिंगाणा म्हणजे १००% मनोरंजनाची हमी. नव्या जोशात आणि नव्या ढंगात चौथे पर्व प्रेक्षकांच्या मनोरंजनासाठी सज्ज आहे. अशा शब्दात सिद्धार्थ जाधवने भावना व्यक्त केली.
थीम पार्कची जादू आणि भन्नाट गेम्स
प्रत्येक पर्वात प्रेक्षकांना काहीतरी नवे देण्याचा स्टार प्रवाह वाहिनीचा प्रयत्न असतो. चौथ्या पर्वात प्रेक्षकांना थीमपार्कची जादू अनुभवता येणार आहे. थीम पार्कमध्ये ज्याप्रमाणे अद्भूत आणि अविश्वसनीय गोष्टींची सफर घडते अगदी त्याप्रमाणेच धिंगाणाचा मंच भन्नाट गेम्सच्या माध्यमातून मनोरंजनाची धमाल सफर घडवणार आहे.
सुपरहिट फेऱ्या नव्या ट्विस्टसोबत
मागच्या पर्वात सुपरहिट ठरलेल्या ‘स्मायली काय गायली’, ‘धुवून टाक’, ‘गोरी गोरी पान गाते किती छान’ या सुपरहिट फेऱ्या नव्या ट्विस्टसोबत या पर्वातही असणार आहेत. याच्या सोबतीला अनेक नव्या अतरंगी फेऱ्या देखील पाहायला मिळतील. सर्वात महत्त्वाचं म्हणजे गेल्या तीन पर्वात ज्या फेरीची सर्वाधिक चर्चा रंगली त्या ‘साडे माडे शिंतोडे’चं भव्यदिव्य रूप या पर्वाचं प्रमुख आकर्षण ठरेल.