मराठी चित्रपटसृष्टीत मानाचा समजला जाणारा 'फिल्मफेअर मराठी' पुरस्कार सोहळा नुकताच पार पडला. यंदाच्या पुरस्कार सोहळ्यात अनेक कलाकारांचा गौरव करण्यात आला, त्यामध्ये विशेष लक्ष वेधून घेतलं ते मराठी चित्रपटसृष्टीतील लोकप्रिय आणि हरहुन्नरी अभिनेता क्षितीश दाते याने. क्षितीश दाते याला ‘धर्मवीर 2’ चित्रपटातील भूमिकेसाठी फिल्मफेअर मराठी 2025 मध्ये सर्वोत्कृष्ट सहाय्यक अभिनेता (Best Supporting Actor) पुरस्काराने सन्मानित करण्यात आले आहे.

‘धर्मवीर 2’ मध्ये क्षितीश दातेने माननीय एकनाथ शिंदे यांची भूमिका साकारली होती. या भूमिकेद्वारे त्याने एका राजकीय नेत्याचा प्रवास, संघर्ष आणि भावनिक बाजू प्रभावीपणे मांडली. या भूमिकेस प्रेक्षकांसोबतच समीक्षकांकडूनही भरघोस प्रतिसाद मिळाला होता.

हा क्षितीश दातेचा पहिलाच फिल्मफेअर पुरस्कार असून, त्यांच्या सशक्त अभिनय प्रवासातील तो एक महत्त्वाचा टप्पा मानला जात आहे.

सध्या क्षितीश दाते हॉटस्टारवरील ‘मिस्त्री’ या वेब शोमध्ये झळकत आहेत. याशिवाय, तो रंगमंचावरही सक्रिय असून ‘मी Vs मी’ हे नाटक सध्या रंगभूमीवर यशस्वीपणे सुरू आहे. आगामी काळातही क्षितीश वेगवेगळ्या माध्यमांतून नवनवीन भूमिकांमधून प्रेक्षकांच्या भेटीला येणार आहेत.