मेक्सिको सिटी : बांगलादेश आणि नेपाळपाठोपाठ आता अमेरिकेचा शेजारी देश असलेल्या मेक्सिकोमध्ये तरुणाई (जेन-झी आंदोलन) रस्त्यावर उतरली आहे. वाढती गुन्हेगारी, बोकाळलेला भ्रष्टाचार आणि सरकारविरुद्धच्या असंतोषाविरुद्ध तरुणाईच्या संतापाचा उद्रेक झाला. तरुणांचे आंदोलन पाहून विरोधी पक्षांचे नेते आणि वृद्धही आता आंदोलनात सहभागी झाले आहेत. दरम्यान, पोलिसांनी आंदोलन दडपण्याचा प्रयत्न केल्याने पोलीस आणि आंदोलकांमध्ये हिंसक झडप झाली.
‘जनरेशन झेड’च्या तरुणांनी केलेल्या निदर्शनांना विरोधी पक्षाच्या वरिष्ठ नेत्यांचा मोठा पाठिंबा मिळाला. मात्र, निदर्शनाचे हिंसाचारात रूपांतर झाले. हिंसाचारात अनेक जण जखमी झाले असून मोठ्या प्रमाणावर अटकसत्र करण्यात आले आहे. शनिवारी झालेल्या मोर्चात एकूण १०० पोलीस जखमी झाले आहेत. त्यापैकी ४० जणांना रुग्णालयात दाखल करण्यात आले. तर चार जणांना मानसिक धक्का बसला आहे. जखमी झालेल्यांवर उपचार सुरू आहेत. या संघर्षात २० नागरिक जखमी झाले आहेत.
शनिवारी मेक्सिको सिटीच्या रस्त्यावर अचानक हजारो लोक जमले. हातात फलक, चेहऱ्यावर संताप आणि वेगवेगळ्या घोषणा देत त्यांनी आंदोलन सुरू केले. जेन-झी तरुण (१९९७ ते २०१२ दरम्यान जन्मलेली मुले) या आंदोलनाच्या केंद्रस्थानी होते. आंदोलकांनी राष्ट्रपती भवनाला घेराव घातल्यानंतर पोलिसांनी त्यांना रोखण्यासाठी अश्रूधुराच्या नळकांड्या फोडल्या. त्यानंतर आंदोलक आणखी आक्रमक झाल्याचे पाहावयास मिळाले.