न्यू यॉर्क/वॉशिंग्टन : काश्मीर खोऱ्यातील पहलगाम येथे २२ एप्रिल रोजी दहशतवादी हल्ला करून २६ पर्यटकांची हत्या करणाऱ्या ‘द रेझिस्टन्स फ्रण्ट’ (टीआरएफ) या दहशतवादी संघटनेला अमेरिकेने ‘परदेशी दहशतवादी संघटना’ म्हणून घोषित केले आहे. अमेरिकेचे परराष्ट्रमंत्री मार्को रुबियो यांनी ही माहिती दिली आहे. पहलगाम हल्ल्याची जबाबदारी ‘टीआरएफ’ने स्वीकारली होती.
‘द रेझिस्टन्स फ्रंट’ ही पाकिस्तानमधील कुख्यात दहशतवादी संघटना ‘लष्कर-ए-तैय्यबा’चीच एक शाखा असल्याचे अमेरिकेने म्हटले आहे. ही संघटना सातत्याने काश्मीर खोऱ्यात कुरापती करत आहे. ‘टीआरएफ’ लष्करचाच एक भाग असल्याच्या वृत्तांवर अमेरिकेचे परराष्ट्र मंत्री मार्को रुबियो यांनी शिक्कामोर्तब केले आहे. संयुक्त राष्ट्रानेही ‘टीआरएफ’ला दहशतवादी संघटना घोषित केले आहे. या संघटनेचे मुख्यालय पाकिस्तानमध्ये आहे.
दहशतवादी संघटना ठरवल्याने काय होणार?
अमेरिकेने ‘टीआरएफ’ ही संघटना ‘फॉरेन टेरर ऑउटफिट’ असल्याची घोषणा केल्यानंतर आता या संघटनेची आर्थिक नाकेबंदी केली जाईल. या संघटनेवर आर्थिक व प्रवासी निर्बंध लागू केले जातील. अमेरिकेच्या परराष्ट्र विभागाने म्हटले आहे की, यामुळे दहशतवादविरोधी प्रयत्नांमध्ये जागतिक भागीदारांबरोबर वॉशिंग्टनचे सहकार्य आणखी मजबूत होईल. ‘टीआरएफ’चा भारतातील अनेक दहशतवादी हल्ल्यांशी संबंध आहे.
निर्णय राष्ट्रीय हितासाठी
रुबियो यांनी जारी केलेल्या निवेदनात म्हटले आहे की, ‘टीआरएफ’ला दहशतवादी संघटना घोषित करण्याचा निर्णय आपल्या राष्ट्रीय संरक्षण हितांसाठी, दहशतवादाशी दोन हात करण्यासाठी महत्त्वाचा आहे. तसेच हा निर्णय पहलगाममधील हल्ल्यानंतर पीडितांच्या न्यायासाठी आपली वचनबद्धता दर्शवतो. ‘टीआरएफ’ने पहलगाममधील दहशतवादी हल्ल्याची जबाबदारी स्वीकारली होती. ‘लष्कर’ने २००८ मध्ये मुंबईवर केलेल्या दहशतवादी हल्ल्यानंतर सामान्य नागरिकांवर केलेला हा दुसरा सर्वात मोठा दहशतवादी हल्ला होता, असेही अमेरिकेच्या अधिकाऱ्यांनी म्हटले आहे.