वजन कमी करायचंय पण नेमकं काय खावं? चिया सीड्स की सब्जा; ‘फॅट बर्न’साठी कोणतं बी आहे जास्त असरदार?
वाढतं वजन, बाहेर आलेली पोटाची ढेरी आणि सततचा थकवा… हल्ली ही समस्या अनेकांच्या आयुष्याचा भाग बनली आहे. वजन कमी करण्यासाठी कुणी डाएट करतात, तर कुणी महागडे सुपरफूड्स आहारात समाविष्ट करतात. अशाच लोकप्रिय सुपरफूड्समध्ये चिया सीड्स आणि सब्जा या दोन बियांची सध्या मोठी चर्चा आहे. दोन्हीही आरोग्यासाठी फायदेशीर मानले जात असले तरी वजन कमी करण्यासाठी नेमकं कोणतं बी जास्त उपयोगी ठरतं, हा प्रश्न अनेकांना पडतो.
दिसायला जवळपास सारखे असले तरी चिया सीड्स आणि सब्जा यांच्या गुणधर्मांमध्ये मोठा फरक आहे. शरीरावर होणारे परिणाम, खाण्याची पद्धत आणि पोषणमूल्येही वेगळी आहेत. त्यामुळे आपल्या शरीराची गरज आणि जीवनशैली लक्षात घेऊन योग्य पर्याय निवडणं महत्त्वाचं ठरतं.
वजन कमी करण्यासाठी सब्जा कसा फायदेशीर?
सब्जामध्ये सॉल्युबल फायबर भरपूर प्रमाणात असतं. त्यामुळे पोट जास्त वेळ भरलेलं राहण्यास मदत होते आणि सतत काहीतरी खाण्याची इच्छा कमी होते. उन्हाळ्यात शरीराला थंडावा देण्यासाठीही सब्जा उपयुक्त मानला जातो.
सब्जा पचनसंस्था सुरळीत ठेवण्यास मदत करतो. बद्धकोष्ठता आणि पोट फुगण्याचा त्रास कमी झाल्यास वजन नियंत्रणात ठेवणं तुलनेने सोपं होतं. शरीरातील उष्णता कमी करण्यासाठीही अनेकजण नियमित सब्जा पाण्यात भिजवून पितात.
चिया सीड्स का मानले जातात सुपरफूड?
चिया सीड्समध्ये फायबर, प्रोटीन आणि ओमेगा-३ फॅटी ॲसिड्स भरपूर प्रमाणात असतात. त्यामुळे मेटाबॉलिझम वेगवान होण्यास मदत मिळते. नियमित व्यायाम करणाऱ्यांसाठी चिया सीड्स अधिक फायदेशीर मानले जातात, कारण ते स्नायूंना पोषण देतात आणि शरीराला दीर्घकाळ ऊर्जा पुरवतात.
चिया सीड्स खाल्ल्याने पोट बराच वेळ भरलेलं राहतं. त्यामुळे अनावश्यक स्नॅक्स किंवा जंक फूड खाण्याचं प्रमाण कमी होऊ शकतं. वर्कआउटनंतर शरीराला एनर्जी मिळवून देण्यासाठीही हे बीज उपयुक्त ठरतं.
मग नेमकं काय जास्त फायदेशीर?
जर तुमचं मुख्य उद्दिष्ट शरीराला थंडावा देणं, पोट भरलेलं ठेवणं आणि हलकं वाटणं असेल, तर सब्जा चांगला पर्याय ठरू शकतो. पण जर तुम्ही नियमित व्यायाम करत असाल आणि स्नायूंना पोषण देत वजन कमी करायचं असेल, तर चिया सीड्स अधिक फायदेशीर मानले जातात.
आरोग्य तज्ज्ञांच्या मते, ऋतू आणि शरीराच्या गरजेनुसार या दोन्ही बियांचा संतुलित वापर करणं अधिक योग्य ठरतं.
खाण्याची योग्य पद्धत
एक चमचा सब्जा १५ मिनिटे पाण्यात भिजवून त्यात लिंबू आणि मध मिसळून पिऊ शकता.
चिया सीड्स रात्रभर पाण्यात भिजवून सकाळी दही, ओट्स किंवा स्मूदीमध्ये घालून खाऊ शकता.
दिवसातून १ ते २ चमचे इतकंच प्रमाण पुरेसं मानलं जातं.
हे पदार्थ खाताना दिवसभर पुरेसं पाणी पिणं अत्यंत आवश्यक आहे.
एकंदरीत, चिया सीड्स आणि सब्जा हे दोन्हीही आरोग्यासाठी फायदेशीर आहेत. मात्र वजन कमी करण्यासाठी फक्त सुपरफूड्सवर अवलंबून न राहता संतुलित आहार, नियमित हालचाल आणि पुरेशी झोप यांनाही तितकंच महत्त्व द्यावं लागतं.