दररोज डबा नेण्यासाठी वापरली जाणारी लंच बॅग ही आपल्या दैनंदिन जीवनाचा महत्त्वाचा भाग असते. मात्र, सततच्या वापरामुळे त्यामध्ये अन्न सांडणे, ओलावा साचणे आणि वाफ अडकणे यामुळे बॅग अस्वच्छ होऊ शकते. अनेकदा वरून साफसफाई केल्यानंतरही बॅगमध्ये दुर्गंधी राहते, विशेषतः इन्सुलेटेड अस्तरामध्ये. त्यामुळे फक्त बाहेरून साफ करण्याऐवजी वेळोवेळी डीप क्लिनिंग करणे गरजेचे ठरते. काही सोप्या आणि प्रभावी उपायांनी लंच बॅग स्वच्छ ठेवता येऊ शकते.
कोपरे नीट स्वच्छ करा
अन्नाचे छोटे कण अनेकदा बॅगच्या शिवणीत आणि कोपऱ्यांमध्ये अडकतात. हे भाग नियमित साफसफाईत दुर्लक्षित राहतात. सौम्य साबणाच्या पाण्यात जुना टूथब्रश बुडवून या भागांवर हलक्या हाताने घासावे. विशेषतः कोपऱ्यांमध्ये साचलेली घाण स्वच्छ केल्यास दुर्गंधी आणि जंतू कमी होण्यास मदत होते.
अन्नाचे डाग हटवण्यासाठी एन्झाइम क्लिनर वापरा
दूध, ग्रेव्ही किंवा मांसाहारी पदार्थ सांडल्यामुळे बॅगमध्ये तीव्र वास राहू शकतो. अशावेळी साध्या साबणाऐवजी एन्झाइम बेस्ड क्लिनर अधिक प्रभावी ठरू शकतो. हे क्लिनर अन्नातील प्रोटिन्स तोडून वास कमी करण्यास मदत करतात. कापडाच्या मदतीने थोड्या प्रमाणात क्लिनर लावून काही मिनिटांनी स्वच्छ पुसावे.
स्टीम क्लिनिंगने करा निर्जंतुकीकरण
लंच बॅग पाण्यात भिजवण्याऐवजी स्टीम क्लिनिंग हा उत्तम पर्याय ठरू शकतो. हँडहेल्ड स्टीमर किंवा गरम पाण्याच्या वाफेचा वापर करून बॅग स्वच्छ करता येते. उष्णतेमुळे जंतू कमी होतात आणि अस्तरामध्ये चिकटलेली घाण निघते. मशीनमध्ये धुता न येणाऱ्या बॅगसाठी हा उपाय अधिक उपयुक्त ठरतो.
इन्सुलेटेड भागातील दुर्गंधी दूर करा
इन्सुलेटेड अस्तरामध्ये अन्नाचा वास बराच काळ राहू शकतो. अशावेळी बॅगमध्ये रात्रभर बेकिंग सोडा किंवा ॲक्टिव्हेटेड चारकोल ठेवावे. हे पदार्थ दुर्गंधी शोषून घेतात आणि बॅग अधिक ताजी वाटते.
झिप आणि लॉकचीही घ्या काळजी
बॅगच्या झिपमध्ये अनेकदा चिकट घाण साचते, ज्यामुळे झिप अडकू शकते. कोमट साबणाच्या पाण्यात कापसाचा बोळा भिजवून झिप स्वच्छ करावी. त्यानंतर झिपवर थोडे पेट्रोलियम जेली किंवा मेण लावल्यास ती सुरळीत चालते. योग्य देखभालीमुळे बॅगचे आयुष्यही वाढते.
सूर्यप्रकाश आणि हवेमुळे मिळतो ताजेपणा
डीप क्लिनिंगनंतर लंच बॅग उलटी करून काही वेळ हवेशीर जागेत आणि अप्रत्यक्ष सूर्यप्रकाशात ठेवावी. सूर्यप्रकाशातील अल्ट्राव्हायोलेट किरणांमुळे जंतू आणि दुर्गंधी निर्माण करणारे सूक्ष्मजीव कमी होण्यास मदत होते. ताजी हवा आणि सूर्यप्रकाशामुळे बॅग अधिक स्वच्छ आणि फ्रेश वाटते.
नियमित साफसफाई ठरू शकते फायदेशीर
लंच बॅगची नियमित आणि योग्य पद्धतीने साफसफाई केल्यास ती अधिक काळ स्वच्छ, सुरक्षित आणि दुर्गंधीमुक्त राहू शकते. काही छोट्या सवयींमुळे रोज वापरली जाणारी बॅग अधिक हायजेनिक ठेवणे शक्य होते.