दातांचे आरोग्य चांगले ठेवण्यासाठी केवळ नियमित ब्रश करणे किंवा माउथवॉश वापरणे पुरेसे नसते. आपण रोज काय खातो, याचाही दात आणि हिरड्यांच्या आरोग्यावर थेट परिणाम होत असतो. साखरयुक्त पदार्थ, शीतपेये आणि जंक फूडमुळे दात किडणे, कॅव्हिटी होणे आणि हिरड्यांचे आजार होण्याचा धोका वाढतो. याउलट काही नैसर्गिक पदार्थ दात मजबूत ठेवण्यास आणि तोंडाचे आरोग्य सुधारण्यास मदत करतात.
तज्ज्ञांच्या मते, योग्य आहारामुळे केवळ दातांचेच नव्हे तर संपूर्ण शरीराचे आरोग्य सुधारते. मधुमेह, हृदयविकार आणि स्ट्रोक यांसारख्या आजारांचाही संबंध तोंडाच्या आरोग्याशी असल्याचे संशोधनातून स्पष्ट झाले आहे.
१. चीज (Cheese)
चीजमध्ये कॅल्शियम आणि प्रथिने भरपूर प्रमाणात असतात, जे दात मजबूत ठेवण्यास मदत करतात. चीज चावल्यामुळे तोंडात लाळेचे प्रमाण वाढते. त्यामुळे तोंडातील आम्लाचे प्रमाण कमी होऊन दात किडण्याचा धोका कमी होतो.
२. हिरव्या पालेभाज्या
पालक, केल आणि इतर हिरव्या पालेभाज्या कॅल्शियम, जीवनसत्त्वे आणि खनिजांनी समृद्ध असतात. या भाज्या दातांच्या एनॅमलला मजबूत बनवतात आणि हिरड्यांचे आरोग्य सुधारण्यास मदत करतात.
३. सफरचंद
सफरचंदामध्ये पाणी आणि फायबरचे प्रमाण जास्त असते. सफरचंद खाल्ल्याने लाळेचे प्रमाण वाढते, ज्यामुळे तोंडातील बॅक्टेरिया आणि अन्नकण दूर होण्यास मदत होते. तसेच त्यातील फायबर हिरड्यांसाठीही फायदेशीर ठरते.
४. दही
दह्यामध्ये कॅल्शियम, प्रथिने आणि प्रोबायोटिक्स असतात. हे चांगले जीवाणू तोंडातील हानिकारक बॅक्टेरियांची संख्या कमी करण्यास मदत करतात. त्यामुळे कॅव्हिटीचा धोका कमी होतो. मात्र, साखर नसलेले साधे दही खाणे अधिक फायदेशीर ठरते.
५. गाजर
कच्चे गाजर खाल्ल्याने तोंडात अधिक लाळ तयार होते. त्यामुळे दातांवर अडकलेले अन्नकण साफ होण्यास मदत होते. गाजरामध्ये फायबर आणि व्हिटॅमिन ए मुबलक प्रमाणात असल्याने दात आणि हिरड्यांचे आरोग्य चांगले राहते.
६. बदाम
बदामामध्ये कॅल्शियम आणि प्रथिने भरपूर असतात, तर साखरेचे प्रमाण अत्यल्प असते. त्यामुळे दात मजबूत ठेवण्यासाठी बदाम हा उत्तम पर्याय मानला जातो. रोजच्या आहारात मूठभर बदामांचा समावेश केल्यास तोंडाचे आरोग्य सुधारण्यास मदत होऊ शकते.
दातांच्या आरोग्यासाठी लक्षात ठेवा...
साखरयुक्त पदार्थ आणि शीतपेये मर्यादित प्रमाणात घ्या.
दिवसातून दोन वेळा फ्लोराईडयुक्त टूथपेस्टने ब्रश करा.
भरपूर पाणी प्या.
कॅल्शियम आणि प्रथिनयुक्त पदार्थांचा आहारात नियमित समावेश करा.
दर सहा महिन्यांनी दंतवैद्यांकडून तपासणी करून घ्या.
तज्ज्ञांच्या मते, योग्य आहार आणि नियमित तोंडाची स्वच्छता या दोन्ही गोष्टींचा समतोल राखल्यास दात दीर्घकाळ मजबूत आणि निरोगी राहू शकतात.
(Disclaimer: यामध्ये दिलेले आरोग्यविषयक सल्ले सामान्य मार्गदर्शनासाठी आहेत. नवशक्ति' यातून कोणताही दावा करत नाही.)