Monsoon Travel : पावसाळा सुरू होताच महाराष्ट्रातील डोंगररांगा, घाटमाथे आणि धबधबे नव्या रूपात खुलून दिसू लागतात. शहराच्या धकाधकीतून थोडा विरंगुळा हवा असेल, तर मुंबईजवळील काही निसर्गरम्य ठिकाणे रोड ट्रिपसाठी उत्तम पर्याय ठरू शकतात. एका दिवसाची सहल असो किंवा वीकेंड ट्रिप, पावसाळ्यात या ठिकाणांचा अनुभव अविस्मरणीय ठरतो.
१. लोणावळा – खंडाळा
अंतर : सुमारे ८५ किमी
प्रवासाचा कालावधी : २ तास
पावसाळा म्हटलं की सर्वप्रथम आठवण येते ती लोणावळा-खंडाळ्याची. मुंबई-पुणे द्रुतगती मार्गावरील हा प्रवास धुक्याने झाकलेले डोंगर, हिरवाई आणि धबधब्यांनी अधिकच सुंदर बनतो. येथे टायगर पॉइंट, भुशी धरण आणि राजमाची व्ह्यू पॉइंट ही प्रमुख आकर्षणे आहेत.
२. माळशेज घाट
अंतर : सुमारे १३० किमी
प्रवासाचा कालावधी : ३.५ ते ४ तास
सह्याद्रीच्या कुशीत वसलेला माळशेज घाट पावसाळ्यात निसर्गप्रेमी आणि छायाचित्रकारांसाठी स्वर्गच ठरतो. उंच डोंगर, दाट धुके, रस्त्यालगत कोसळणारे धबधबे आणि हिरवाईने नटलेले निसर्गदृश्य या ठिकाणाचे मुख्य आकर्षण आहे.
३. इगतपुरी
अंतर : सुमारे १२० किमी
प्रवासाचा कालावधी : ३ तास
मुंबई-नाशिक महामार्गावरील इगतपुरी हे शांत आणि निसर्गरम्य ठिकाण आहे. पावसाळ्यात येथील डोंगर, तलाव आणि धबधबे अधिकच मनमोहक दिसतात. भातसा नदीचे खोरे, कॅमल व्हॅली आणि वैतरणा धरण ही येथे आवर्जून पाहण्यासारखी ठिकाणे आहेत.
४. भंडारदरा
अंतर : सुमारे १६५ किमी
प्रवासाचा कालावधी : ४ तास
सह्याद्रीच्या पर्वतरांगांमध्ये वसलेले भंडारदरा हे शांत आणि रमणीय ठिकाण आहे. आर्थर लेक, रंधा धबधबा आणि विल्सन धरण ही येथील प्रमुख आकर्षणे आहेत. इगतपुरीमार्गे जाणारा रस्ता पावसाळ्यात विशेष नयनरम्य दिसतो.
५. कर्नाळा पक्षी अभयारण्य
अंतर : सुमारे ६० किमी
प्रवासाचा कालावधी : १.५ तास
मुंबई-गोवा महामार्गावर असलेले कर्नाळा पक्षी अभयारण्य एका दिवसाच्या सहलीसाठी उत्तम पर्याय आहे. पावसानंतर येथील हिरवाई, जंगलातील पायवाटा आणि विविध पक्ष्यांचे दर्शन पर्यटकांना वेगळाच अनुभव देते. तसेच कर्नाळा किल्लाही येथे पाहण्यासारखा आहे.
प्रवासाला निघण्यापूर्वी 'या' गोष्टी लक्षात ठेवा
हवामानाचा अंदाज तपासूनच प्रवासाचे नियोजन करा.
घाटरस्त्यावर वाहन सावधगिरीने चालवा.
घसरड्या ठिकाणी सेल्फी किंवा धोकादायक स्टंट टाळा.
रेनकोट, अतिरिक्त कपडे आणि आवश्यक औषधे सोबत ठेवा.
स्थानिक प्रशासनाच्या सूचनांचे पालन करा.