श्रावण महिना म्हणजे पूजा, व्रत-वैकल्यं, सण आणि गोडधोड पदार्थांची रेलचेल. श्रावणी सोमवार, नागपंचमी, रक्षाबंधन किंवा नारळी पौर्णिमेला नैवेद्यासाठी काहीतरी खास बनवायचं असेल, तर डबल लेअर खवा-बेसन लाडू हा उत्तम पर्याय ठरू शकतो.
पारंपरिक बेसन लाडूंना यावेळी एक खास ट्विस्ट द्या. बाहेरून साजूक तुपात भाजलेल्या बेसनाचा खमंग स्वाद आणि आतमध्ये मऊसर खव्याचं रिच स्टफिंग असलेले हे लाडू दिसायलाही आकर्षक आणि चवीला अगदी मिठाईच्या दुकानातील लाडूंप्रमाणे लागतात. कमी साहित्य आणि सोप्या पद्धतीने तयार होणारी ही रेसिपी सणाच्या ताटाची शोभा नक्कीच वाढवेल.
साहित्य :
साजूक तूप - १ कप
बेसन - २ कप
खवा (मावा) - १ कप
पिठीसाखर - १ कप
वेलची पूड - १/२ टीस्पून
केशर - ७ ते ८ काड्या
पिस्त्याची पूड किंवा बारीक तुकडे - २ टेबलस्पून
कृती :
कढईत साजूक तूप गरम करून त्यात बेसन घाला आणि मंद आचेवर सुगंध येईपर्यंत भाजून घ्या.
दुसऱ्या भांड्यात खवा घेऊन त्यात वेलची पूड, केशर आणि पिस्त्याची पूड मिसळा. हे मिश्रण मऊसर मळून त्याचे लहान गोळे तयार करून ठेवा.
भाजलेलं बेसन थोडं कोमट झाल्यावर त्यात पिठीसाखर आणि थोडी वेलची पूड घालून नीट एकजीव करा.
आता हातावर बेसनाचं मिश्रण घेऊन त्याच्या मध्यभागी खव्याचा गोळा ठेवा.
चारही बाजूंनी बेसनाचं मिश्रण लावून गोल आकार देत डबल लेअर लाडू तयार करा.
सर्व लाडू तयार झाल्यानंतर वरून पिस्त्याचे तुकडे किंवा केशर घालून सजवा.
श्रावणातील सणांसाठी हे रिच, मऊसर आणि खमंग डबल लेअर खवा-बेसन लाडू नैवेद्यासाठी तसेच पाहुणचारासाठीही उत्तम पर्याय ठरतील.