उन्हाळ्यात घर असो किंवा ऑफिस एअर कंडिशनिंग (AC) आता अनेकांच्या दैनंदिन आयुष्याचा भाग बनलं आहे. AC मुळे उकाड्यापासून आराम मिळतो, पण सतत थंड हवेत राहिल्याने त्वचेवर त्याचा परिणाम दिसू लागतो. अनेकांना त्वचा ओढल्यासारखी वाटणे, चेहरा निस्तेज दिसणे किंवा अचानक ड्रायनेस वाढल्याचा अनुभव येतो.
AC हवेतील ओलावा कमी करतो. त्यामुळे त्वचेतील नैसर्गिक मॉइश्चर हळूहळू कमी होतं आणि त्वचा कोरडी पडू लागते. काही वेळा डोळ्यांखाली काळी वर्तुळे, फाईन लाईन्स किंवा अकाली सुरकुत्याही दिसू शकतात. मात्र, काही सोप्या सवयी अंगीकारल्या तर AC मध्ये राहूनही त्वचा मऊ, हायड्रेटेड आणि फ्रेश ठेवता येते.
१. त्वचेला हायड्रेट ठेवा
AC मध्ये जाण्यापूर्वी त्वचेवर हलकं मॉइश्चरायझर किंवा हायलुरोनिक ॲसिड असलेलं सीरम वापरा. यामुळे त्वचेतील ओलावा टिकून राहतो आणि ड्रायनेस कमी होतो.
२. फेस मिस्ट किंवा गुलाबपाण्याचा वापर करा
घरात किंवा कामाच्या ठिकाणी जवळ फेस मिस्ट किंवा गुलाबपाण्याची स्प्रे बाटली ठेवा. काही तासांनी हलका स्प्रे केल्यास त्वचेला ताजेपणा मिळतो आणि कोरडेपणाची भावना कमी होते.
३. डोळे आणि ओठांकडे दुर्लक्ष करू नका
AC चा सर्वात जास्त परिणाम डोळ्यांखालच्या त्वचेवर आणि ओठांवर दिसतो. त्यामुळे नियमित लिप बाम आणि अंडर-आय क्रीम वापरणं फायदेशीर ठरतं.
पाणी कमी पिणंही ठरू शकतं कारण
AC मध्ये राहताना तहान कमी लागते, पण शरीराला पाण्याची गरज कायम असते. त्वचा हायड्रेट ठेवण्यासाठी दिवसभरात पुरेसं पाणी, नारळपाणी किंवा फळांचा रस घेणं महत्त्वाचं आहे.
लहान सवयी, मोठा फरक
त्वचेचा ग्लो टिकवण्यासाठी महागड्या प्रॉडक्ट्सची गरज नसते. रोजच्या काही छोट्या सवयींमुळे AC मध्ये राहूनही त्वचा फ्रेश आणि निरोगी ठेवता येते.
(Disclaimer : या लेखातील माहिती ही सामान्य माहिती व घरगुती उपायांवर आधारित आहे. ‘नवशक्ति’ या उपायांच्या परिणामकारकतेची हमी देत नाही. कोणताही उपाय करण्यापूर्वी आपल्या त्वचेच्या प्रकारानुसार तज्ज्ञांचा सल्ला घ्यावा.)