उन्हाळा सुरू झाला की चेहऱ्यासोबतच पायांवरही त्याचा परिणाम दिसू लागतो. बाहेर पडताना चप्पल, सँडल किंवा खुल्या फुटवेअरमुळे पायांवर टॅनिंग साचतं, टाचा कोरड्या पडतात आणि त्वचा निस्तेज दिसू लागते. अशावेळी अनेकजण पेडिक्युअर किंवा बॉडी पॉलिशिंगसाठी पार्लरचा पर्याय निवडतात. पण त्यासाठी नेहमीच मोठा खर्च करावा लागतो, असं नाही.
घरच्या घरी अगदी कमी साहित्यांत पायांची स्वच्छता आणि निगा राखता येऊ शकते. त्यासाठी महागडी उत्पादने वापरण्याचीही गरज नाही. दैनंदिन वापरातील काही साध्या गोष्टींच्या मदतीने पायांवरील साचलेली घाण, मृत त्वचा आणि काळपटपणा कमी करण्यास मदत होऊ शकते.
कसा कराल उपाय?
सुरुवातीला एका टबमध्ये कोमट पाणी घ्या आणि त्यात थोडा शॅम्पू मिसळा. या पाण्यात पाय साधारण १५ ते २० मिनिटे भिजत ठेवा. यामुळे नखांच्या कडा, टाचा आणि पायांवरची कडक झालेली त्वचा मऊ होण्यास मदत होते.
यानंतर पाय थोडे मऊ झाल्यावर स्वच्छतेची पुढची पायरी सुरू होते. जुना टूथब्रश किंवा प्युमिस स्टोन वापरून नखांच्या कडा आणि टाचा हलक्या हाताने घासून स्वच्छ करा. यामुळे वरचा सैल झालेला थर निघण्यास मदत होऊ शकते.
अजून चांगला परिणाम हवा असेल, तर उरलेल्या शॅम्पूमध्ये थोडी साखर आणि लिंबाचा रस मिसळून स्क्रब तयार करता येतो. हा स्क्रब पायांवर हलक्या हाताने लावल्यास मृत त्वचा कमी होण्यास मदत होऊ शकते. साखर त्वचा स्वच्छ करण्यासाठी उपयुक्त ठरते, तर लिंबामुळे त्वचा तजेलदार दिसण्यास मदत मिळू शकते.
मॉइश्चरायझिंगही तितकंच महत्त्वाचं
पाय स्वच्छ पाण्याने धुऊन व्यवस्थित कोरडे केल्यानंतर त्यावर लोशन किंवा खोबरेल तेल लावणं महत्त्वाचं ठरतं. कोमट पाण्यामुळे त्वचा थोडी कोरडी पडू शकते. त्यामुळे शेवटी मॉइश्चरायझर लावल्यास पायांचा मऊपणा टिकवून ठेवता येतो.
आठवड्यातून एकदा पुरेसं
हा उपाय रोज करण्याची गरज नाही. आठवड्यातून एकदा १० ते १५ मिनिटे दिली, तरी पाय स्वच्छ, मऊ आणि व्यवस्थित दिसण्यास मदत होऊ शकते. कमी खर्चात घरच्या घरी करता येईल असा हा उपाय अनेकांसाठी उपयोगी ठरू शकतो.
उन्हाळ्यात पायांवर टॅनिंग आणि कोरडेपणा येणं सामान्य आहे. मात्र, त्यासाठी लगेच महागड्या ट्रीटमेंट्सकडे वळण्याची गरज नाही. थोडी काळजी, साधं साहित्य आणि नियमित निगा यामुळे पायांचा लूक आणि मऊपणा दोन्ही टिकवून ठेवता येऊ शकतात.