आशिष सिंह/मुंबई

नाशिकमधील ढोंगी बाबा अशोक खरात याच्याशी संबंधित मनी लाँड्रिंग प्रकरणाचा तपास करत असताना ‘अंमलबजावणी संचालनालया’ने (ईडी) शुक्रवारी नाशिकच्या कॅनडा कॉर्नर परिसरातील खरातचे व्यावसायिक कार्यालय असलेल्या ‘ओक्स प्रॉपर्टी ऑफिस’वर छापेमारी केली. एसआयटीने २६ मार्च रोजी या आवारावर छापा टाकून १०० हून अधिक आक्षेपार्ह व्हिडीओ आणि इतर साहित्य जप्त केल्यानंतर हे कार्यालय सील केले होते.

‘एसआयटी’ने दिलेल्या माहितीनुसार, या शोधमोहिमेत नाशिक, पुणे आणि सोलापूर येथील ८० पेक्षा जास्त मालमत्तेची कागदपत्रे आणि ५२ सातबारा उतारे जप्त केले. यात शिर्डीतील १० ते १२ कोटी रुपयांचे वेडिंग लॉन, नाशिकमधील ५ कोटी रुपयांचा बंगला, सोलापूर आणि सिन्नरमधील १५ कोटी रुपयांची शेतजमिनीचा समावेश आहे.