छत्रपती संभाजीनगर : समर्पण, शिस्त, धाडस आणि साहसाची प्रेरणादायी कहाणी म्हणजे समर्थनगर, छत्रपती संभाजीनगर येथील रतीश कुलकर्णी यांचा प्रवास. गेल्या १२ वर्षांपासून डायव्हिंग क्षेत्रात कार्यरत असलेल्या रतीश यांनी अंदमान आणि निकोबार बेटांवर आपल्या कौशल्याची वेगळी ओळख निर्माण केली आहे. पॅडी मास्टर इन्स्ट्रक्चर म्हणून कार्यरत असलेल्या रतीश कुलकर्णी यांनी आपल्या १२ वर्षांच्या अनुभवाच्या जोरावर दोन उल्लेखनीय गिनीज वर्ल्ड रेकॉर्ड आपल्या नावावर केले आहेत. त्यांच्या या कामगिरीमुळे छत्रपती संभाजीनगरसह संपूर्ण महाराष्ट्राचा गौरव झाला आहे.
रतीश यांनी मिळवलेले दोन गिनीज वर्ल्ड रेकॉर्ड म्हणजे पाण्याखाली सर्वात मोठा राष्ट्रीय ध्वज फडकवण्याचा विक्रम आणि सर्वात उंच मानवी रचनेचा विक्रम. हे दोन्ही विक्रम साकारण्यासाठी उत्कृष्ट टीमवर्क, अचूक नियोजन, शिस्त, समन्वय आणि अत्यंत कौशल्याची आवश्यकता होती. या ऐतिहासिक कामगिरीची दखल घेत अंदमान आणि निकोबार बेटांचे उपराज्यपाल ॲडमिरल डी. के. जोशी यांच्या हस्ते रतीश यांना उपराज्यपाल प्रशस्तिपत्र आणि पदक देऊन गौरवण्यात आले. स्वातंत्र्यदिन २०२६ च्या निमित्ताने हा सन्मान प्रदान करण्यात आला.
कौशल्य, साहसाच्या जोरावर आव्हानात्मक मोहिम यशस्वी
रतीश यांचा हा प्रवास केवळ वैयक्तिक यशाची कहाणी नसून कठोर परिश्रम, जिद्द आणि आपल्या क्षेत्रातील प्राविण्याच्या जोरावर जागतिक स्तरावर भारताचे नाव उंचावण्याची प्रेरणादायी गाथा आहे. छत्रपती संभाजीनगरच्या समर्थनगरमधून सुरू झालेला हा प्रवास अंदमानच्या अथांग समुद्रापर्यंत पोहोचला आणि अखेर दोन गिनीज वर्ल्ड रेकॉर्डच्या रूपाने इतिहासात नोंदला गेला. १२ वर्षांचा अनुभव, पॅडी मास्टर इन्स्ट्रक्चर म्हणून मिळवलेले कौशल्य आणि साहसाची आवड यामुळे रतीश यांनी आव्हानात्मक मोहिमांना यशस्वीपणे पूर्ण करून जागतिक स्तरावर छाप उमटवली.
कुटुंब, महाराष्ट्रासाठी प्रेरणादायी कहाणी
रतीश कुलकर्णी यांच्या या कामगिरीमुळे त्यांच्या कुटुंबीयांसह मित्रपरिवार, समर्थनगर, छत्रपती संभाजीनगर आणि महाराष्ट्रासाठी अभिमानाचा क्षण निर्माण झाला आहे. त्यांच्या या यशातून तरुणांना आपल्या ध्येयासाठी सातत्याने प्रयत्न करण्याची आणि आव्हानांना धैर्याने सामोरे जाण्याची प्रेरणा मिळते. छत्रपती संभाजीनगरपासून अंदमानच्या समुद्रापर्यंतचा रतीश यांचा प्रवास म्हणजे जिद्द, कौशल्य, साहस आणि देशाभिमानाच्या बळावर इतिहास घडवणारी प्रेरणादायी कहाणी आहे.