मुंबई : महाराष्ट्र सरकारतर्फे विद्यार्थ्यांसाठी दिल्या जाणाऱ्या मध्यान्ह भोजन योजनेच्या अन्नधान्याच्या गैरव्यवहार प्रकरणात आरोप असलेल्या शाळेच्या माजी मुख्याध्यापकांना उच्च न्यायालयाने जामीन नाकारला आहे.
न्यायमूर्ती राजेश पाटील यांच्या एकल खंडपीठाने गुरुवारी दिलेल्या निर्णयात नमूद केले की, आरोपी राधा नारायण या सत्य माहिती देत नसून, त्यांची कोठडीतील चौकशी आवश्यक आहे.
या प्रकरणात आरोप आहे की, कोविड-१९ महामारीदरम्यान, नारायण यांनी शाळेसाठी शासनाकडून पुरवलेले अंदाजे ५ लाख रुपये किमतीचे धान्य हडप केले. हे धान्य विद्यार्थ्यांना वितरित करण्यासाठी होते. न्यायालयाने आदेशात म्हटले आहे की, ही योजना विद्यार्थ्यांना पौष्टिक आहार मिळावा यासाठी आहे. मात्र, सरकारी निधीचा उद्देश साध्य होत नसल्याचे आढळून आले.
"मुख्याध्यापक सत्य आणि खरी माहिती देत नाहीत. प्राथमिकदृष्ट्या, हे प्रकरण वरवर दिसते त्यापेक्षा काहीतरी अधिक गंभीर आहे," न्यायमूर्ती पाटील यांनी नमूद केले. नारायण यांनी आपल्या याचिकेत दावा केला की, शाळेच्या परिसरात पाणी साचल्याने धान्य नष्ट झाले. मात्र, न्यायालयाने हा दावा फेटाळून लावला आणि विचारले की, धान्य खराब झाल्याचे सिद्ध करण्यासाठी आरोपीने किमान काही छायाचित्रे तरी का घेतली नाहीत?
त्यांनी नगरपालिका व शिक्षण अधिकाऱ्यांना याबाबत किमान ईमेलद्वारे तरी माहिती का दिली नाही, असा सवालही न्यायालयाने केला.
"मुंबईत पावसामुळे काही भागांत पाणी साचते. समजा, २०२१ मध्ये शाळेच्या आवारात पाणी साचले होते, तर हे दरवर्षी होत असेल. मुख्याध्यापक म्हणून आरोपीने धान्य वरच्या मजल्यावर ठेवून त्याचे रक्षण करण्याची जबाबदारी घ्यायला हवी होती. मात्र, त्यांनी तसे काहीही केले नाही," असे न्यायालयाने स्पष्ट केले. न्यायालयाने नारायण यांची जामीन याचिका फेटाळून लावताना नमूद केले की, "या प्रकरणात आरोपीची प्रत्यक्ष उपस्थिती चौकशीसाठी आवश्यक आहे."
त्यांनी सरकारला नुकसानभरपाई म्हणून ५ लाख रुपये जमा करण्याची तयारी दर्शवली, मात्र न्यायालयाने हा प्रस्ताव नाकारला आणि म्हटले की, "सरकारच्या नुकसानीची भरपाई घेऊन आरोपीची जबाबदारी कमी केली जाऊ शकत नाही." फिर्यादीत नमूद केल्याप्रमाणे, मार्च २०२१ मध्ये शाळेला मध्यान्ह भोजन योजनेअंतर्गत ६,४०० किलो हरभरा व मसूर डाळ पुरवण्यात आली होती. त्यापैकी ३,४८१ किलो धान्य विद्यार्थ्यांना वितरित करण्यात आले, मात्र उर्वरित २,९९२ किलो धान्य वितरित करण्यात आले नाही.