उद्याच्या आषाढी एकादशीनिमित्त विठुरायाच्या चरणी नतमस्तक होण्यासाठी राज्यभरातून लाखो वारकरी पंढरपुरात दाखल होत असतानाच वारकऱ्यांच्या एका बसचा मुंबई-पुणे एक्स्प्रेस मार्गावर भीषण अपघात झाल्याचे समोर आले आहे. डोंबिवलीहून पंढरपूरकडे निघालेल्या वारकऱ्यांच्या बसला रात्री १ च्या सुमारास ट्रॅक्टरने धडक दिल्याने ५ जणांचा मृत्यू झाला तर अनेकजण जखमी झाले आहेत. घटनेची माहिती मिळताच महामार्ग पोलीस घटनास्थळी दाखल झाले. जखमींना तातडीने रुग्णालयात दाखल करण्यात आले आहे. मृतांची नावे अद्याप समजू शकलेली नाहीत.
मिळालेल्या माहितीनुसार, डोंबिवलीतील भाविकांचा एक गट ट्रॅव्हल्स बसने पंढरपूरला जात होता. बसमध्ये ५४ भाविक होते. रात्री उशीरा १ वाजण्याच्या सुमारास, बस मुंबई-पुणे एक्स्प्रेस वेवरून पंढरपूरकडे जात होती. त्यावेळी बसच्या पुढे एक ट्रॅक्टर होता. पण, अचानक बसच्या चालकाचे नियंत्रण सुटले आणि ट्रॅक्टरला धडकल्याने बस ३० ते ४० फूट खोल दरीत पडली. अंधारात ट्रॅक्टर न दिसल्याने बसने ट्रॅक्टरला जोरदार धडक दिल्याचे सांगितले जात आहे.
या अपघातात पाच जणांचा मृत्यू झाला असून २० ते २५ जण जखमी झाले आहेत. जखमींपैकी काहींची प्रकृती चिंताजनक असल्याची माहिती आहे.
अपघाताची माहिती मिळताच मुंबई-पुणे द्रुतगती मार्गावरील पोलिसांनी तात्काळ घटनास्थळी धाव घेतली. त्यांनी तातडीने बचावकार्य केले आणि जखमींना जवळच्या एमजीएम रुग्णालयात आणि पनवेल ग्रामीण रुग्णालयात उपचारासाठी दाखल केले. दरम्यान, एक्स्प्रेस वेवर ट्रॅक्टरला बंदी असतानाही या मार्गावर ट्रॅक्टरला प्रवास करण्याची परवानगी कशी दिली, असा प्रश्न आता उपस्थित होत आहे.