महाराष्ट्र राज्य सरकारच्या वतीने देण्यात येणारा कृषीरत्न पंजाबराव देशमुख पुरस्कार राज्यपाल भगतसिंह कोश्यारी यांच्या हस्ते घेण्यास बारामती कृषी विज्ञान केंद्राचे अध्यक्ष राजेंद्र पवार यांनी नकार दिला आहे. छत्रपती शिवाजी महाराज आणि फुले दांपत्यासंदर्भात कोश्यारी यांनी केलेली वादग्रस्त विधाने लक्षात घेता त्यांच्या हातून पुरस्कार घेण्याऐवजी मी कार्यालयात जाऊन तो स्वीकारेन, असे राजेंद्र पवार यांनी म्हटले आहे.
राज्यपाल भगतसिंह कोश्यारी आणि महाविकास आघाडी सरकारमधील सुप्त संघर्ष वेळोवेळी उघड झाला आहे. आता हा वाद पुन्हा एकदा चव्हाट्यावर आला असून राष्ट्रवादीचे आमदार रोहित पवार यांचे वडील आणि बारामती कृषी विज्ञान केंद्राचे अध्यक्ष राजेंद्र पवार यांनी राज्यपाल भगतसिंह कोश्यारी यांच्या हातून पुरस्कार घेण्यास नकार दिला आहे. महाराष्ट्र राज्याच्या कृषी विभागाने राजेंद्र पवार यांना कृषीरत्न पंजाबराव देशमुख पुरस्कार जाहीर केला आहे.