प्रतिनिधी/जळगाव : येत्या २०२४-२५ या शैक्षणिक वर्षापासून महाराष्ट्रातील एकाही विद्यार्थिनीला उच्च शिक्षणाच्या अभ्यासक्रमासाठी कोणतेही शैक्षणिक शुल्क भरावे लागणार नाही. जवळपास ८०० अभ्यासक्रमांसाठी ही सवलत लागू राहणार असल्याची घोषणा उच्च व तंत्रशिक्षण मंत्री चंद्रकांत पाटील यांनी शुक्रवारी येथे केली.
बहिणाबाई चौधरी उत्तर महाराष्ट्र विद्यापीठात योगशास्त्र आणि शिक्षणशास्त्र विभागाच्या इमारतीचे उद्घाटन चंद्रकांत पाटील यांच्या हस्ते झाले. चंद्रकांत पाटील म्हणाले, ‘‘मुख्यमंत्री एकनाथ शिंदे यांनी परभणीतील एका विद्यार्थिनीच्या आत्महत्येनंतर मुलींच्या शुल्क माफीविषयी चर्चा केली होती. त्या अनुषंगाने उच्च शिक्षणासाठी मुलींचे शैक्षणिक शुल्क माफ करण्याचा निर्णय घेण्यात आला आहे. आता अभियांत्रिकी, वैद्यकीय, विधी, असे विविध ६४२ व्यावसायिक अभ्यासक्रम आणि नव्याने सुरू होणाऱ्या २०० अभ्यासक्रमांसाठी महाराष्ट्रात एकाही विद्यार्थिनीला शुल्क भरावे लागणार नाही.’’ कवयित्री बहिणाबाई चौधरी उत्तर महाराष्ट्र विद्यापीठाला स्थापनेनंतर शिक्षकांची नवीन पदे मंजूर झालेली नाहीत. ही परिस्थिती लक्षात आणून दिल्यानंतर चंद्रकांत पाटील यांनी येत्या मंगळवारी मंत्रालयात तातडीची बैठक घेऊन आजवर विद्यापीठाने शिक्षक पदांसाठी दिलेले प्रस्ताव आणि त्यांची स्थिती याबाबत वस्तुस्थिती जाणून घेतली जाईल, असे आश्वासन दिले.