जव्हार : गणेशोत्सव शांततेत, उत्साहात आणि कायदा-सुव्यवस्था अबाधित ठेवत पार पाडण्यासाठी जव्हार पोलीस ठाण्याच्यावतीने सोमवारी तहसील कार्यालयात गणेशोत्सव मंडळांच्या पदाधिकाऱ्यांसह नागरिकांची बैठक घेण्यात आली. गणेशमूर्ती स्थापना, मिरवणूक, विसर्जन, डीजेचा आवाज, लेझर लाइट तसेच समाजमाध्यमांवरील आक्षेपार्ह संदेशांबाबत पोलिसांनी स्पष्ट सूचना देत नियमभंग करणाऱ्यांवर कारवाईचा इशारा दिला.
नियमांचे काटेकोर पालन
गणेश मंडळांचे अध्यक्ष व सदस्य, पोलीस मित्र, ज्येष्ठ व प्रतिष्ठित नागरिक, शांतता मोहल्ला समितीचे सदस्य तसेच डीजे वादक बैठकीला उपस्थित होते. गणेशमूर्तीची स्थापना, मिरवणुकीचा मार्ग व वेळ आणि विसर्जनाबाबत प्रशासनाने निश्चित केलेल्या नियमांचे काटेकोर पालन करण्याचे आवाहन पोलीस प्रशासनाने केले.
डीजेच्या आवाजावर मर्यादा
डीजेच्या आवाजाची निर्धारित मर्यादा व वेळेचे बंधन पाळण्यासह लेझर लाइटच्या वापराबाबतच्या नियमांचे पालन करण्याच्या सूचना देण्यात आल्या. ध्वनिप्रदूषणामुळे नागरिकांना त्रास होणार नाही, याची विशेष दक्षता घेण्याचे आवाहन पोलिसांनी केले.
मंडळांच्या पदाधिकाऱ्यांना मार्गदर्शन
मिरवणुकीदरम्यान वाहतुकीला अडथळा निर्माण होणार नाही, याची दक्षता घेण्यासह निर्धारित मार्ग व वेळेचे पालन करण्याच्या सूचना देण्यात आल्या. विसर्जनस्थळी गर्दीचे नियोजन, नागरिकांची सुरक्षितता आणि आवश्यक खबरदारी याबाबत उपविभागीय पोलीस अधिकारी समीर मेहेर यांनी मंडळांच्या पदाधिकाऱ्यांना मार्गदर्शन केले.
सोशल मीडियावरही नजर
सामाजिक तेढ निर्माण करणाऱ्या, धार्मिक भावना दुखावणाऱ्या अथवा दोन समाजांमध्ये गैरसमज व तणाव निर्माण करणाऱ्या कोणत्याही पोस्ट, संदेश किंवा व्हिडीओंचा समाजमाध्यमांवर प्रसार करू नये, असा स्पष्ट इशारा पोलीस प्रशासनाने दिला. अशा प्रकारचे कृत्य आढळल्यास संबंधितांवर नियमानुसार कारवाई करण्यात येईल, असे यावेळी सांगण्यात आले.
विविध विभागांकडून सूचना
महावितरणचे अधिकारी सुशील नाशिककर, एसटी महामंडळाच्या प्रभारी व्यवस्थापक उषा घुगे तसेच नगरपरिषदेच्या प्रतिनिधींनीही मंडळांना विविध सूचना दिल्या. वीजपुरवठा, मिरवणुकीच्या मार्गावरील सुरक्षितता, बससेवा व वाहतूक व्यवस्था, स्वच्छता आणि सार्वजनिक सुविधांबाबत संबंधित विभागांनी मार्गदर्शन केले. बैठकीस जव्हारचे उपविभागीय पोलीस अधिकारी समीर मेहेर, उपविभागीय अधिकारी सिद्धार्थ राजकुमार, विविध विभागांचे अधिकारी, गोपनीय कामकाज सांभाळणारे कैलास राठोड, प्रदीप विटकर, पोलीस कर्मचारी, गणेश मंडळांचे पदाधिकारी आणि नागरिक उपस्थित होते.