मुंबई : पंढरपुरात श्री विठ्ठल-रुक्मिणी दर्शनासाठी राज्यभरातून येणाऱ्या भाविकांच्या सुविधेसाठी तसेच गोमाता संवर्धनासाठी राज्य सरकारने यमाई तलावालगतची गट नं. १६१ मधील ३ हेक्टर १२ गुंठे इतकी शासकीय जमीन श्री विठ्ठल- रुक्मिणी मंदिर समितीला प्रदान करण्यास मान्यता दिली आहे. महसूल मंत्री चंद्रशेखर बावनकुळे यांनी मंगळवारी यासंदर्भातील माहिती दिली.
मंदिर समितीच्या कार्यकारी अधिकाऱ्यांनी या जागेची मागणी केली होती. भाविकांना आवश्यक सोयीसुविधा उपलब्ध करून देणे आणि ‘गोमाता पालन-संवर्धन केंद्र’ याठिकाणी उभारण्यात येणार आहे. तीन वर्षांच्या आत मंजूर प्रयोजनासाठी (गोमाता संवर्धन आणि भाविकांची सुविधा) या जागेचा वापर सुरू करणे बंधनकारक राहील. ज्या कामासाठी जमीन दिली आहे, केवळ त्याच कामासाठी तिचा वापर करता येईल. इतर कोणत्याही तात्पुरत्या किंवा कायमस्वरूपी वापरासाठी सरकारची पूर्वपरवानगी घेणे आवश्यक राहील.