मुंबई : एसटी महामंडळातील विविध विभागामध्ये भ्रष्टाचार तसेच इतर आरोप असलेल्या १७ अकार्यकारी अधिकाऱ्यांच्या चौकशीसाठी प्रशासनाने समिती नेमली आहे. मात्र आरोप असलेल्या प्रत्येक अधिकाऱ्याच्या कामाचे स्वरूप वेगळे असल्याने समितीतील सदस्य अधिकाऱ्यांना कुणाला, कुठले काम द्यावे या बाबतीत अडचणी निर्माण झाल्या आहेत. यामुळे समितीचे काम धीम्यागतीने सुरू असल्याने भ्रष्टाचाराचे आरोप असलेले अधिकारी अजूनही मोकाटच असल्याचा आरोप महाराष्ट्र एसटी कर्मचारी काँग्रेसने केला आहे.
अकार्यकारी अधिकाऱ्यांना कोणत्याही प्रकारच्या जबाबदारी शिवाय वर्षानुवर्षे वेतन देण्यात येत आहे. हे आर्थिक अडचणीतील एसटीसाठी संयुक्तिक नाही. आरोपा बाबतीत अंतिम निर्णय होत नाही, तोपर्यंत त्यांना वेगळे काही काम देता येईल का? या संदर्भात चौकशी समिती गठित करण्यात यावी अशी मागणी महाराष्ट्र एसटी कर्मचारी काँग्रेसने केली होती. त्या नंतर राज्य शासनाच्या परिवहन विभागाने दिलेल्या आदेशानुसार महामंडळाने पाच सदस्यीय चौकशी नेमली असून या समितीच्या आता पर्यंत फक्त दोन बैठका घेण्यात आल्या आहेत. पण ही समिती सर्व समावेशक नसून ती अर्धवट असल्याचे स्पष्ट झाले आहे.
भ्रष्टाचाराचे आरोप असलेले अधिकारी हे वेगवेगळ्या विभागातील असल्याने प्रत्येकाच्या कामाचे स्वरूप सुद्धा वेगवेगळे आहे.