जळगाव : छत्रपती संभाजीनगरहून सुरतकडे जाणाऱ्या एसटी बसच्या स्टिअरिंग यंत्रणेत बिघाड झाल्याने बसवरील चालकाचा ताबा सुटला. ही घटना चाळीसगाव तालुक्यातील कन्नड घाटात रविवारी सकाळी घडली. बस रस्त्याच्या कडेला असलेल्या कठड्याला धडकून अडकल्याने खोल दरीत कोसळण्यापासून बचावली. बसमधील तब्बल ५९ प्रवासी सुखरूप असल्याची माहिती पोलिसांनी दिली.
स्टिअरिंगमध्ये अचानक बिघाड झाल्याने बस अनियंत्रित होऊन थेट रस्त्याच्या कडेला गेली. त्यानंतर बस कठड्याला अडकून थांबली. या प्रकारामुळे बसमधील प्रवाशांमध्ये मोठी घबराट पसरली. बस कठड्याला अडकल्यानंतर काही प्रवाशांनी खिडक्यांमधून बाहेर पडण्याचा प्रयत्न केला. अखेर सर्व प्रवाशांना सुरक्षितपणे बसमधून बाहेर काढण्यात आले.
या घटनेत चार प्रवासी किरकोळ जखमी झाले असून, त्यांना उपचारासाठी तातडीने रुग्णालयात दाखल करण्यात आले. त्यांच्यावर उपचार सुरू आहेत.
दरम्यान, बसच्या स्टिअरिंग यंत्रणेत नेमका कोणता बिघाड झाला, स्टिअरिंग रॉड तुटला की स्टिअरिंग जाम झाले, याबाबत अधिकृत तपास सुरू आहे. घटनेची माहिती मिळताच पोलीस यंत्रणा घटनास्थळी दाखल झाली.