मराठा आरक्षणासाठी मनोज जरांगे पाटील आणि अनेक आंदोलक मुंबईच्या दिशेने येत असतानाच एक दुःखद बातमी समोर आली आहे. मराठा समाजासाठी लढ्यात सहभागी असलेल्या एका आंदोलकाचा हृदयविकाराच्या झटक्याने मृत्यू झाला.

मृत्यू झालेल्या आंदोलकाचं नाव सतीश देशमुख असून ते मूळचे बीड जिल्हयातील केज तालुक्यातील वडगावचे रहिवासी आहेत.

आंदोलनादरम्यान बिघडली तब्येत

सतीश देशमुख हे गेल्या अनेक दिवसांपासून आंदोलनात सक्रिय सहभागी होते. ते मुंबई मोर्चासाठी निघाले असतानाच जुन्नरमध्ये अचानक त्यांची प्रकृती खालावली. त्यांना तातडीने रुग्णालयात नेण्यात आले, मात्र डॉक्टरांनी त्यांना मृत घोषित केले. त्यांच्या पश्चात पत्नी संध्या, मुलगा प्रसाद आणि वृद्ध आई पुष्पाबाई असा परिवार आहे.

या घटनेने मराठा समाजावर शोककळा पसरली आहे. आंदोलनाच्या उंबरठ्यावरच आपल्या सहकाऱ्याचा मृत्यू झाल्याने सहभागी आंदोलक भावनिक झाले आहेत. सतीश देशमुख यांच्या निधनाने कुटुंबीयांवर दुःखाचा डोंगर कोसळला असून, गावात हळहळ व्यक्त होत आहे.