नाशिक : टीसीएस कंपनीतील धर्मांतर आणि अत्याचार प्रकरणातील मुख्य संशयित आरोपी महिला निदा खान हिला संभाजीनगर येथे बेकायदेशीरपणे आश्रय देणारा एमआयएम नगरसेवक मतीन पटेल सोमवारी अपेक्षेप्रमाणे नाशिक पोलिसांसमोर हजर झाला. यावेळी त्याचे वकील उपस्थित होते.
पोलीस आयुक्तालयात एसआयटीकडून त्याच्यावर प्रश्नांची सरबत्ती करण्यात आल्याची माहिती सूत्रांनी दिली.
मतीन पटेल याने निदा खान हिला तिला छत्रपती संभाजीनगर येथे स्वतःच्या घरात लपवून ठेवत आश्रय दिल्याचे प्रकरण उघडकीस आले होते. याप्रकरणी नाशिकच्या देवळाली कॅम्प पोलीस ठाण्यात मतीन पटेलविरुद्ध गुन्हा दाखल केला होता.
त्यानंतरच्या घडामोडीत नाशिक पोलिसांचे पथक त्याच्या शोधार्थ संभाजीनगरमध्ये गेले असता तो हाती लागू शकला नाही. पोलिसांच्या गुन्हे शाखेने मतीन पटेल यास थेट कायदेशीर नोटीस बजावली आणि तो आज शरण आला.
मतीन पटेल यांच्या चौकशीनंतर पोलीस त्यांना अटक करणार की त्यांची जामीनावर मुक्तता होणार, याबाबत अद्याप कोणतीही अधिकृत स्पष्टता मिळालेली नाही.