मुंबई : एसटीच्या अधिकृत हॉटेल थांब्यावरील विविध समस्या प्रवाशांनी उपस्थित केल्यानंतर एसटी महामंडळ खडबडून जागे झाले आहे. यानंतर महामंडळाने त्वरित एक परिपत्रक काढून संपूर्ण राज्यातील अशा हॉटेल-मोटेल थांब्याबाबत नवीन आचारसंहिता जारी केली आहे. त्यानुसार अधिकाऱ्यांच्या अहवालाच्या आधारे संबंधित हॉटेल थांब्याला मंजुरी दिली जाणार आहे. तसेच हॉटेल थांब्याबाबत प्रवासी तक्रार आल्यास संबंधित अधिकाऱ्यांवर जबाबदारी निश्चित करून कडक कारवाई करण्यात येणार आहे.
नवीन हॉटेल थांब्याला पारदर्शक निविदा प्रक्रियेद्वारे मान्यता देत असताना ती ३ वर्षांसाठी दिली जाईल. परंतु १ वर्षानंतर संबंधित हॉटेल थांब्यावरील सेवा- सुविधेचा फेर आढावा घेऊन पुढील २ वर्षांच्या मुदतवाढीबाबत विचार केला जाणार आहे. तसेच या हॉटेल थांब्याची निवड करताना तेथील स्वच्छता, अन्नपदार्थ दर्जा आणि बसेसची पार्किंग व्यवस्था यांचा प्राधान्याने विचार केला जावा, असे देखील निविदा प्रक्रियेत नमूद केले जाणार आहे.
प्रत्यक्ष भेटून पाहणी अपेक्षित
हॉटेल थांब्याची शिफारस करताना त्या क्षेत्रातील आगार व्यवस्थापक, विभागीय वाहतूक अधिकारी व विभाग नियंत्रक यांनी प्रत्यक्ष भेटून पाहणी करणे अपेक्षित आहे. त्यांच्या वस्तुस्थितीजन्य अहवालाच्या आधारे संबंधित हॉटेल थांब्याला मंजुरी दिली जाणार आहे. त्यामुळे भविष्यात या हॉटेल थांब्या संदर्भात कोणतीही प्रवासी तक्रार उद्भवल्यास संबंधित अधिकाऱ्यांवर जबाबदारी निश्चित करून कडक कारवाई करण्यात येणार आहे.