मुंबई : मुंबई-पुणे द्रुतगती मार्गावरील ३३ तासांच्या वाहतूक कोंडीला जबाबदार असलेल्या टँकर चालकाविरुद्ध गुन्हा दाखल करण्यात आला आहे. निष्काळजीपणे आणि धोकादायकपणे वाहन चालवणे, इतरांचे जीवन तसेच वैयक्तिक सुरक्षितता धोक्यात आणणे या आरोपांखाली उत्तर प्रदेशातील आझमगढ येथील रहिवासी रतन सिंग उदय नारायण सिंग (४४) याच्याविरुद्ध खोपोली पोलीस ठाण्यात गुन्हा दाखल करण्यात आला आहे.

ज्वलनशील प्रोपीलीन वायू घेऊन जाणारा हा टँकर ३ फेब्रुवारी रोजी सायंकाळी ५ वाजण्याच्या सुमारास आदोशी बोगद्याजवळ उलटला होता. उतारावर चालकाचे वाहनावरील नियंत्रण सुटल्यानंतर भरधाव टँकर उलटला. हा टँकर कोचीनहून गुजरातकडे जात होता.

या घटनेत चालक आणि त्याचा मदतनीस जखमी झाले असून त्यांना नवी मुंबईतील एका खाजगी रुग्णालयात दाखल करण्यात आले. अपघातानंतर ३३ तासांनी ५ फेब्रुवारी रोजी पहाटे द्रुतगती मार्गाच्या मुंबईकडे जाणाऱ्या मार्गावरील वाहतूक पूर्ववत करण्यात आली होती.