नाशिक : बहुराष्ट्रीय कंपनीतील अविवाहित तरुणीवर बलात्कारासह तिच्या धर्मांतराच्या प्रयत्नातील संशयितांनी पीडितेचे ‘हानिया’ असे नामांतर करण्यासाठी ५ एप्रिल २०२५ म्हणजे एक वर्षापूर्वी इंटरनेटवर नावाचा शोध घेतल्याचे समोर आले आहे. त्यानंतर पीडितेची शैक्षणिक कागदपत्रे स्वतःकडे घेत त्यांनी नामांतर करून तिच्या बदललेल्या नावे नऊ हजार रुपयांची ‘जकात’ भरल्याचे स्पष्ट झाले. याबाबत न्यायालयात ‘एसआयटी’ने पुरावे दिले आहेत.
देवळाली कॅम्प पोलीस ठाण्यांत अविवाहित पीडितेच्या फिर्यादीवरून दानिश शेख, तौसिफ अत्तार, निदा खान यांच्यावर गुन्हा नोंद आहे, तर छत्रपती संभाजीनगरातील ‘एमआयएम’चा नगरसेवक मतीन पटेल, घरमालक हानिफ शेख यांना शहर पोलिसांच्या विशेष तपास पथकाने सहसंशयित केले आहे. मतीनने निदाला हानिफचे घर उपलब्ध करून देत आश्रय दिला होता. या गुन्ह्यातील संशयित दानिश याला काही दिवसांपूर्वी मालेगावच्या ‘इस्लाम पार्टी’ने पाठिंबा दिला होता. पार्टीचे संस्थापक अध्यक्ष व माजी आमदार आशिफ शेख यांनी दानिशला वकील व कायदेशीर मदत पुरवली आहे. त्यानंतर खटल्याची दुसरी सुनावणी २२ जून नाशिक रोड न्यायालयात झाली. निदाचा वैद्यकीय अहवाल मागवण्याबाबत अर्ज निदाच्या वकिलांनी सादर केला.
पंधराशे पानांचे दोषारोपपत्र
कारागृहात असलेली निदा गर्भवती असून तिच्या शरीरातील लोह कमी झाले आहे. निदासह दानिश शेख व तौसिफ अत्तार यांचा मुक्काम नाशिकरोड मध्यवर्ती कारागृहात आहे. या प्रकरणात तब्बल पंधराशे पानांचे दोषारोपपत्र दाखल करण्यात आले आहे.