प्रतिनिधी/मुंबई : पुणे जिल्ह्यातील पुरंदर तालुक्यात स्ट्राँग रूममधून डमी ईव्हीएम मशीन चोरी झाल्याप्रकरणाची गंभीर दखल केंद्रीय निवडणूक आयोगाने घेतली असून तीन अधिकाऱ्यांना निलंबित करण्याचे आदेश दिले आहेत. पुणे जिल्ह्यातील उपविभागीय अधिकारी, तहसीलदार, पुरंदर तसेच संबंधित उपविभागीय पोलीस अधिकारी यांना तत्काळ निलंबित करून पुढील चौकशी करण्याचे आदेश दिले आहेत. तसेच या प्रकरणाची सविस्तर चौकशी करण्यासाठी समिती नेमण्याचे निर्देशही देण्यात आल्याची माहिती राज्याचे मुख्य निवडणूक अधिकारी श्रीकांत देशपांडे यांनी दिली.
राज्यामध्ये १० डिसेंबर ते २८ फेब्रुवारी या कालावधीत ईव्हीएमबाबत जनजागृती व प्रसिद्धीचा कार्यक्रम सर्व जिल्ह्यांमध्ये राबविण्यात येत आहे. पुणे जिल्ह्यातील पुरंदर विधानसभा मतदारसंघाकरिता उपविभागीय अधिकारी पुरंदर यांचे मुख्यालय सासवड येथे आहे. तेथील तहसील कार्यालयातील स्ट्राँगरूममध्ये पुरंदर विधानसभा मतदारसंघातील ईव्हीएम जनजागृती कार्यक्रमासाठी वापरावयाच्या ४० ईव्हीएम यूनिट ठेवण्यात आल्या आहेत. सदर स्ट्राँगरूमकरिता सासवड पोलिस स्टेशनकडून सुरक्षा व्यवस्था पुरविण्यात आलेली आहे. जिल्हाधिकारी, पुणे तसेच पोलीस अधीक्षक, पुणे ग्रामीण यांच्या माहितीनुसार शनिवार किंवा रविवारी या ईव्हीएमपैकी एक कंट्रोल युनिट चोरीला गेल्याचे निदर्शनास आले होते. तसेच त्यासोबत कोरे पेपर रीम ५ व स्टेशनरी सुध्दा चोरीस गेलेली होती याची गंभीर दखल आयोगाने घेतली आहे.